Kaj Kleist: Naalakkersuisoqarfiit pisortaat kalaaliussapput
Namminersornerullutik Oqartussat allaffissuarmini pisortaqarfiit 14-it arfineq-marluinnanngortippagit, pisortat qallunaat inuulluaqquneqarniartut, naalakkersuisut siulittaasuata Hans Enoksenip tallimanngormat ataatsimiinnermi oqaatigigaa, Sermitsiaq allaaserinnippoq.
-Soraarsitsisoqarnavianngilaq, Namminersornerullutik Oqartussani pisortaaneq Kaj Kleist oqarpoq, imalu nassuiaalluni.
- Tassa siullermik naalakkersuisoqarfimmi pisortassat arfineq-marluusussaapput, ilaalu qularnanngitsumik aqutsisoqarfinnut assigiinngitsunut inissikkallarneqartussaassapput, Kaj Kleist nassuiaavoq.
Pisortallu tamarmik kalaaliussasut Naalakkersuisut siulittaasuata oqaatigereerpaa:
- Suu, naalakkersuisoqarfinni pisortassat tassani pineqartut kalaaliussapput. Soorunami ukiut ingerlanerini aamma ajornanngippat, aqutsisoqarfinni pisortat aamma kalaalinngornissaat naatsorsuutigaavut, nassuiaavoq.
Imalu allanngortiterinissamut tunngavilersuivoq.
- Kommunit kommunerusussuanngornissaannut atatillugu Naalakkersuisut siulittaasuata oqaatigereernikuuaa aamma uagut pisortaqarfinni sulineq aaqqissuussaanerpullu eqaannerulissasoq aamma ikilisitsinissamut siunnersuuteqassasugut. Tamannalu tassa pisussanngorpoq, oqarpoq.
Innuttaasunik sullissineq ajorseriassanngitsoq aamma naatsorsuutigaa.
- Neriuppunga taamaattoqassanngitsoq, pingaartumik ukioq 2008-mi. Soorunami kommunit sullinneranni innuttaasunillu sullissinitsinni immaqa allanngortiterinermi kinguaattoortoqarsinnaassaaq, kisianni ataatsimut isigalugu tamanna neriuppunga aaqqissinnaassallutigu, Namminersornerullutik Oqartussat pisortaanerat oqarpoq.
Aappaagulu ukioq 2008 assorujussuaq allanngortiteriffiussaaq.
- Ia, taamatut oqaatigisariaqarparput, Kaj Kleist oqarpoq.
Aqutsisoqarfiit ilaat tassaalissapput: Akileraartarnermut akitsuutinullu immikkoortortaq aamma aningaasaqarnermut sulisoqarnermullu immikkoortortaq, Aningaasaqarnermut nunanullu allanut naalakkersuisoqarfiup ataaniilertussat. Aamma inuussutissarsiornermut suliffeqarnermullu aqutsisoqarfik, aamma angallannermut avatangiisinullu immikkoortoqarfik kiisalu Ineriartortitsinermut pilersaarusiornermullu aqutsisoqarfik Ilaqutariinnermut Peqqissutsimullu Naalakkersuisoqarfiup ataaniilertussat.