Kaj Egede unikaallalaaqqusivoq

maajip 26-at 2007 13:23

Naak Tele Greenland A/S sinneqartoorujussuaraluartoq - akileraartigani 106 millioner koruuninik, taava Namminersornerullutik Oqartussat pigisaanni siulersuisut siulittaasuat, Kaj Egede, unikaallalaaqqusivoq.

- Atuisut akinik apparsaaffigineqareerput. Aningaasaliiffigisassalli angisuut utaqqipput, Kaj Egede oqarpoq:

- Attaveqaatitigut ineriartorneq ullumikkut ima sukkatigisumik ingerlavoq, aamma aningaasaliinissat annertoorujussuit Radiokædip nutarternissaa, immakkut kabeliliinissat, ilaalu ilanngullugit, suliniarnerit aningaasarparujussuarnik naleqartussat, akilertussaavagut, taakkualu sillimmartaarfigisariaqarpavut uagut Tele-p tungaaninngaaniit.

Immakkut kabelimik siaarsinissamut atatillugu Tele-p nammineq aningaasaatimi 700 millioni koruunit saniatigut aningaasanik atorniartariaqassaaq. Radiokædi tamatuma saniatigut aamma pitsanngorsarneqassaaq, 100 millioni koruuninik siulersuisut siulittaasuannit akeqassangatinneqartumik.

Itisiliinermi, ualilluarpat nalunaaqutaq arfinermut aallakaatinneqartussami, Tele Greenland A/S ataatsimeersuaqqammertoq sammineqassaaq.