Kaj Egede: Oqaatsit pingaarnerpaajunngillat

Oqaatsit pingaarnerpaajunngillat. Tele Greenlandimi siulersuisut siulittaasuat Kaj Egede; Sermitsiamut ullumikkut saqqummersumut taama oqarpoq.

- Kalaalinngorsaaneq ajorinngilluinnarpara, eqqaamasariaqarporli Tele nunani tamalaani suliffeqarfissuummat.

– Uannut kalaallisut, qallunaatut tuluttulluunniit oqalunneq pingaarnerunngilaq, Kaj Egede oqarpoq.

– Suliffeqarfiilli sulisui qimarratissanngillat. Kalaalinngorsaaneq

pissutigiinnarlugu sulisunik pikkorissunik annaasaqarusunngilagut, oqarpoq.

– Tele Greenland nunani tamalaani suliffeqarfiuvoq nunani tamalaani suliffeqarfinnut allanut naapertuuttuusussaq.

– Nunani tamalaani telemi suliffeqarfinnut allanut naapertuuttuunngikkutta uagut suliffeqarfipput pitsaanerpaanik angusaqarsinnaanngilaq.

– Tassa oqaatsit pingaarnerunngillat, kalaallinilli pisinnaasaqarluartunik sulisussarsisinnaaneq iluaqutaassaaq.

Kaj Egedep naalakkersuisut kalaalinngorsaanermik oqaraangamik qanoq isumaqartittarneraat paaserusuppaa.

– Kalaalinngorsaanermi oqaatsit imaluunniit inuttut sananeqaatit tunngaviussappat?

Naalakkersuisut itisilerinissaat kissaatiginartippara Kaj Egede Sermitsiamut taama oqarpoq.

Tele Greenland 100 procentimik Kalaallit Nunaanni Namminersornerullutik Oqartussanit pigineqarpoq katillugillu 570-inik sulisoqarluni.