Kaffisorujooqatigalugit oqaloqatigisarpagut, Jiisusip sinneri isumagisarpai

Jeppe Krüger-Iversen aamma Filip Nygaard iivangkiiliulisarlutik minnerunngitsumillu kaffilisarlutik Nuup umiarsualivianukartarput. Kilisaatit umiarsuillu takornariartaatit tamaani talinngarrattunut ilaasarput. Angutilli inuusuttut taakkua marluk aamma kialaarfinnukartarput aamma pineqaatissinneqarsimasunut inissiisarfimmukartarput.

Marluullutik aasaq ilinniarnertuunngorput, iivangkiliumillu nunatsinni umiartortunut ajoqersuiartortitatut Nuummi sømandshjemmimi Hotel Sømami maanna tassa sulillutik. 

Hotel Sømamili niuernerpalaartumik ingerlataasumi ulluinnarni piffissap ilaannaani sulinermi saniatigut inuiaqatigiinni kajumissutsimik suliaqartarput.

Upperisaq kimigiisernani ajoqersuutigineqarsinnaava?

Inuusutulli taakkua marluk 20-nik ukiuliusut oqaloqatigigatsinni kisianneeqattaarput:

- Kajumissutsimik sulinitsinni naapitatsinnik suulluunniit ulluinnarniluunniit pisut pillugit oqaloqateqartarnissarput siunertaavoq.

- Inuit uniffigeriarlugit upperisatsinnik ussiataartanngilagut, naapitavulli kaffisorujuutaa oqaloqateqarusunnersut aperisarpagut, piumasullu isumaliutiminnik oqaluttualersariaraangamik taamaalilluta oqaloqatigilersarpagut, Filip Nygaard oqarpoq.

- Naapitatta ilaasa ullup siuliani sunik unnukkorsiutitorsimanertik eqqartorusukkaangassuk, taava oqaloqatigiissutigisarparput. Kristumiussuserli pillugu eqqartueqatigerusukkaangamitigut, taava aamma soorunami oqaloqatigiissutigisarparput, Jeppe Krüger-Iversen oqarpoq. 

Inuusuit marluk kajumissutsimik suliaqarlutik umiarsuarmi takornariartaammi Nuup umiarsualiviani tulanngasumi inuttanik oqaloqateqariartortut assimi takussaapput. Assi © : Privat

Soorliuna nunatsinnukarniarlutik aalajangersimasut?

Soorliuna kajumissutsimik suliaqarnertalimmik Nuummi sømandshjemmimut suliartorniarlutik aalajangersimasut? Nunatsinnullu qaammatit marluk matuma siornali tikikkamilli arlaleriarlutik taama aperineqartarput, aperineqaraangamillu apeqqut taanna akiuminaatsittarpaat. Erseqqissumik suli maannamut akisinnaanikuunngilaat. Imaluunniit ilumut taamaannerpa?

Taama aalajangernertik ilaatigut peroriartornerannik kristumiussutsillu peroriartorneranni ilaalluinnarnerannik aallaaveqarunavittoq, taakkua oqarput. Upperisartimmi meeraanerminni, inuusuttuunerminni maannalu inersimasunngorsimalernerminni ulluinnarsiutigiuaannarpaat.

- Ataata palasiugami kristumiussuseq ilitsoqqussaraara, ataatagalu naalagiartitsereeraangami naalagianik palasip illorsuani kaffisorujooqatigalugit oqaloqateqartarnera oqaloqatigisaasa iluaqutigilluartaraat takusarpara, Jeppe Krüger-Iversen oqarpoq.

Piffissallu ilaani taamaaliorusuttarput.

Tassa angerlarsimaffitsik qimallugu qaammaterpaalunni umiartoreerlutik tikittunik oqaloqateqarnermut. Angerlarsimaffeqanngitsunik suulluunniit pillugit oqaloqateqarnermut, imaluunniit sapaatit akunneranut ataasiarlutik pineqaatissinneqarsimasunut inissiisarfimmut ornigullutik inissiisarfimmiittunik oqaloqateqarnermut.

- Assersuutigalugu pineqaatissinneqarsimasunut inissiisarfimmiittumik akileralugu oqaloqateqaraangatta, sooq inissiisarfimmiitsitaanersoq eqqarsaatigineq ajorpara. Uagutsitullimi aamma inuummat oqaloqateqarnissamik pisariaqartitsisoq, Jeppe Krüger-Iversen oqarpoq.

Kikkulluunniit asaneqarsinnaappat?

Inuppalaarneq asanninnerlu piumasaqaatitaqanngitsoq. Tassa inuusuit taakkua marluk ilinniaqqilertigatik ukiumi immersorfimminni nunatsinni qaammatini arfinilinni sulinermi saniatigut kajumissutsimik suliaqarnerminni naapitaminnik inuunermi allarluinnarmik imminerminninngarnit killiffiliusunik kaffisoqatigerujuujutigalugit oqaloqateqartarnerup nuannequtigilluinnaagaa nassuiaramikku oqaatsit taakkua marluk uteqattaarpaat.

- Kaffisorujooqatigalugit ammasumik oqaloqatigisarpagut, Jiisusillu sinneri isumagisarpai, Filip Nygaard oqarpoq.

- Kristumiussuseq ilitsoqqussarput asanninnermik ulikkaarpoq, sooq taava tamanna inoqatitsinnut – ingammik inuunermi atukkatigut artorsartunut -  ingerlateqqissanngilarput, taanna akissummik naatsorsuuteqarani aperaaq.

Filip Nygaard umiarsuit Nuup umiarsualiviani tulanngasorpassuit ilaanni issimasoq. – Umiarsuarmi inuttat sulerisarnerannik ilisimasaqarpiaavinnginnatta ikaarnissatsinnut akuerisaakkajuppugut, inuttallu sulerisarnerminnik oqaluttuukkusuttorujussuusarpaatigut. Misigileratarpugullu umiarsuarmi tamarmi takornarniartitaalluta, Filip Nygaard oqarpoq. Assi © : Privat

Tamannarpiarlu kajumissutsimik suliaqartarnerminnut tunngaviulluinnartuusoq paasileratarpaat. Tassa annikikkaluamilluunniit iliuuseqarnikkut allanngueqataasinnaaneq.  

- Allanngueqataaniarlunili iliuuseqarnerup iluatsitsilluarfiujuaannartannginnera angerlarsimaffeqanngitsullu pineqaatissinneqarsimasunulluunniit inissiisarfimmiittut inuunermi atukkatigut artorsaataannik aaqqiisinnaasannginneq aamma akuerisariaqarpoq, Jeppe Krüger-Iversen oqarpoq.

Kisianni tassa suulluunniit naqqaniit aallartiffeqartartut pineqaatissinneqarsimasunullu inissiisarfimmiittunik oqaloqateqarneq tipaatsunnartuaannartoq, taanna oqarpoq. 

Taamaaliorneq inuttut pissarsiaqaataasarpa?

Taamaaliortarnertik inuttut pissarsiaqaatigisaqigitsik, taakkua oqaloqatigigatsinni erseqqissaatigaat.

- Allanik ulapputeqarnani inoqatinut piffissaqarneq naliitsuuvoq, Filip Nygaard oqarpoq.

- Assersuutigalugu qanoq sivisutigisumik umiarsualivimmiissanerluta nalukkajupparput, akunneq umiarsualivimmukaraangatta qanoq sivisutigsumik tassaniissanerluta nalukkajupparput. Akunneq ataasiusinnaasarpoq akunnerilluunniit pingasut, eqqartukkavut suunersut apeqqutaalluinnartarluni, aamma ajunngilluinnarpoq.

Tassa Nuummi sømandshjemmimi ukiup affaani sulinerup saniatigut piffissap ilaata inoqatiminnik oqaloqateqarnermut atornissaa marluullutik pingaartippaat.

Inuusuit taakkua oqaloqatiginerini angut Nuummi sømandshjemmimi isersimaartarfimmiit puttuppoq akuliuffigalutalu.

- Eqqartukkasi soqutiginangaaramil, taanna oqarpoq.

Angut taanna Nuummi angerlarsimaffeqanngitsorpassuarnut ilaasoq ukiuni aqqaneq aappassaannik angerlarsimaffeqanngitsuuvoq. Sømandshjemmimullu ukiuni taakkunani uteqqialluni, taanna oqarpoq.

- Aamma nuannarineqarluarpusi. Uattut angerlarsimaffeqanngitsunut soorlu kialaarfimmi allamiluunniit sinissimasunut ullaakkorsiullertarnersi kajumissutsimillu suliaqartarnersi isumaqaqaaq, taanna qungujorujussuarluni oqarpoq ingerlallunilu.

- Takuulli, tassa taamaammat taamaaliortarpugut, Jeppe Krüger-Iversen angut ingerlasoq tikkuaatigalugu oqarpoq.

- Tassa taamaammat taamaaliortarpugut. Kajumissutsimik suliaqarneq akissarsissutigineq ajorparput, angutilli ingerlaqqammersup qungujorujussuarnera takullugu misigisaq naliitsuuvoq.

- Tassa kajumissutsimik akunnerpassuarni suliaqartarnerup sunniuteqarluartarnera ersertarpoq.

Taamaanneralu qularinikuunngisaannarpaat, soorli taamaaliortarnerlutik inunnit allanit aamma paasineqassasoq kiinneraarfigineqartuarumaarlutillu neriuutigaat.