Kaffillerneq ujaasinermit unitsinneqarpoq

Qallunaat sakkutuuisa umiartortut ukiunik 500-nngortorsiornerat malunnartinniarlugu alapernaarsuummi 'Ejner Mikkelsen'-imi Kuummiuni avataanni kaffillerneq unitsinneqarpoq, qajariarlutik takornariat tammaaneqarnerat nalunaarutigineqarmat.
aggustip 11-at 2010 15:40

- Qallunaat sakkutuui imarsiortut immap eqqaani imaanillu inuuniuteqartunut toqqissisimanermik pilersitseqataasartut pinngitsoorsinnaanngilavut, Justus Hansen Demokraatineersoq Folketingip siulittaasoqarfiani ilaasortanut arlalinnut ippassaq taama oqaluttuarpoq.

Qallunaat politikeriisa umiarsuit alapernaarsuutit Kalaallit Nunaata imartaani qanoq pingaaruteqartigissusiat namminneerlutik tamanna ippassigami misigaat.

Tassami siulittaasoqarfimmi ilaasortat Mogens Lykketoft, Søren Espersen, Holger K. Nielsen Helge Adam Møllerilu umiarsuarmi alapernaarsuummi Ejnar Mikkelsenimi nerrivimmi kaffisorfissami piareersarluarsimasumi issiaqatigalugit Illoqqortoormiuni takornariat qajarissanik angalasut tammaaneqartullu kalerrisaarut aallartimmat. Politikenip nittartagaani taama allaaserinnittoqarpoq.

Qallunaat sakkutuui umiartortut ukiunik 500-nngortorsiornerat malunnartinniarlugu kaffisuuneqarpoq siulittaasoqarfimmilu ilaasortanut Inatsisartut siulittaasoqarfimmeersut Josef Motzfeldt, Per Berthelsen, Olga P. Berthelsen Justus Hansenilu ilaapput, kaffisuunneq tassanngaannaq kipitinneqarmat.

Ejnar Mikkelsen taamaalinerani nunaqarfiup Kuummiut avataanniippoq, tikeraallu katillutik 22-usut umiatsiamik sukkasuuliamik erniinnarluinnaq nunamukaanneqarlutik umiarsuullu tamatuma kinguninngua Tasiilaq sarsullugu. Tamatuma kingorna 'Ejnar Mikkelsen' inuttaalu 20-usut annaassiniarnermi peqataajartorlutik avannamut ingerlaqqipput.

Justus Hansenip Kalaallit Nunaanni qallunaat sakkutuui imarsiortut amerlanerusut assorsuaq pisariaqartinneqarnerat piffissaq atorlugu paasinarsisippaa.

- Ajornartoornermi taamatut ittumi umiarsuaq annaassiniut qaninnerpaaq 925 kilometerinik ungasissuseqarpoq, tamatumanilu uppernarsarneqarluni Tunup annertunerusumik najorneqarnissaata qanoq pisariaqartigissusia.

Søren Espersenillu Dansk Folkepartimeersup pineqartoq pingaarnerpaaq takusinnaavaa.

- Danmark Afghanistanimiit anippat takorloorsinnaavara Atlantikup avannaani umiarsuit annaassiniutit amerlineqarnissaannut akissaqartoqalissasoq, pingaartumillu umiarsuarmik angallavigineqarsinnaasut umiartornissamut annertunerusumik ammaassivigineqarpata, Søren Espersen 'Ejnar Mikkelsen'-imit niulerluni taama oqarpoq.