Kabulimi qaartartumeerisoqarpoq
Afghanistanip illoqarfiisa pingaarnersaanni Kabul-imi qaartartumeerisoqarmat inuit 16-it toqutaapput.
Afghanistanimi oqartussat taama nalunaaruteqarput.
Toqutaasut akornanni arfineq-marluk nunanit allaneersuupput.
Arabiamiut tv-qarfiutaat Al-Jazeera tusagassiaa malillugu amerikamiut sakkutuui toqutaasunut ilaapput.
Imminuujutigaluni qaartartumeerisoqarpoq, USA-llu Afghanistanimi aallartitaqarfiata ungasinngigisaani qaartartoq qaartinneqarpoq.
Qaartitsiffiup nalaani aseruatiternerit annertoorujussuupput, tuluillu nutaarsiassaqartitsiviata Reuters-ip tusarliussai naapertorlugit qaammatit arlallit ingerlanerini aatsaat taama ingasatsigisumik saassussisoqarpoq.