Afghanistanimi ajornartorsiuterpassuit aaqqinniarlugit talibanit ilungersorput, taamaalinerani covid 19, panernersuaqarnerit, pinngortitamilu ajunaarnerit arlaqartut Aghanistanimi 39 milliuuninik innuttaqartumi nalaanneqarput.Assi: Ali Khara/Reuters/Ritzau Scanpix

Kabulimi moskémi qaartartumeerisoqarnerani toqutaasoqarlunilu ikiligaasoqartoq

Kabulimi moskémi ippassaq pingasunngornermi unnukkut qinoqatigiittoqarnerani qaartartumeerisoqarpoq, taamalu sakkortutigisumik kingullermik saassussisoqarmat siorna pivoq.

Afghanistanimi illoqarfiit pingaarnersaanni Kabulimi musliimit qinusarfianni moskémi qaartartumeerisoqarmat, inuit 21-t toqutaapput 33-llu ikiligaallutik.

Kabulip avannamut kippasinnerusortaani unnukkut qinoqatigiittoqarnerani qaartartumeerisoqarpoq.

Qaartartumeerineq sakkortummat qaartartumeeriffigineqartup eqqaani igalaat aseruatitertut, takunnittut nutaarsiassaqartitisvimmut Reutersimut oqaluttuarput.

Meeqqat ikinnerpaamik tallimat napparsimmavimmut unitsinneqartut, napparsimmaveqarfimmi tusarfik oqaluttuarpoq.

Talibanit Aghanistanistanimik siorna aggustimi tiguaanerisa kingorna saassussisarnerit ikileriangaatsiarput.

AAMMA ATUARUK Talibanip pikisitsisutut unnerluunneqarsimasoq ministerissatut qineraa

Ingasaassillutik Islamisiortut sorsuttartui Aghanistanimi arlaleriaqalutik saassussisarput.

Upperisarsarsioqatigiinni qullersat ilaat Kabulimi sapaatit akunnerata siuliani saassussisoqarmat toqutaavoq.

Saassussinermi tassani Islamisk Statikkut akisussaasuullutik nalunaarput.

Afghanistanimi ajornartorsiuterpassuit aaqqinniarlugit talibanit ilungersorput, taamaalinerani covid 19, panernersuaqarnerit, pinngortitamilu ajunaarnerit arlaqartut Aghanistanimi 39 milliuuninik innuttaqartumi nalaanneqarput.

Meeqqat 1 milliuuninit amerlanerusut naammattunik nerisassaqanngillat, taakkualu ikiorneqanngikkunik inuunerat navianartorsiortinneqassasoq, Naalagaaffiit Peqatigiit meeqqat pillugit suleqatigiiffiat Unicef nalunaarpoq.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl