Kabulimi eqqissiviilliorput
Afghanistanip illoqarfiisa pingaarnersaanni akersuuttoqareersoq perulluliortoqareersorlu taqqavanimiut kamaqqaqisut præsidentip illussaarsuanut ingerlaaqatigiipput.
Amerikamiut sakkutuui aamma Naalagaaffiit Peqatigiit sakkutuuisa biilii aqqusinermi ajutoormata akersuuttoqalerpoq perulluliortoqalerlunilu. Pingasut ajutoortoqarnerani toqutaapput, sisamaat aallaaneqarluni toqutaasoq.
Amerikamiut sakkutuui innuttaasut kamaqqaqisut tungaannut eqqarput, toqutarlu amerikamiut sakkutuuinit toqutaasimassasoq eqqoriarneqarpoq.
Innuttaasut kamaqqaqisut Kabulimi præsidentip illorsuata tungaanut tamatuma kingorna aallarsimapput, aqqumminnilu pisiniarfiit inissiallu igalaavinik aserorterisimallutik.
Aqqusinermi ajutoorlutik toqusut timai ingerlaaqatigiinnit nassarneqarput, ingerlaaqatigiillu ataatsikkorsuaq nillerrattarput; ”Amerika piuneerunneqarli” aamma ”Karzai perloqqusaali”. Karzai tassaavoq Afghanistanip præsidentia Hamid Karzai.
