Kabelilersuineq pilersaarutigineqartutut ingerlavoq
Nuummut nunnigunneqarfissai marluupput. Aappaa Dronning Ingridip Napparsimavissuata sissaatigut aappaalu eqqannguani Saqqarliit sissaatigut nunamut apuunneqassapput siaarlugillu assaanneqassallutik.
Apuunneqarfissaat assallugit ingerlanneqareerput siaartitsivigeriaannanngulerlutillu, kabelillu assatamut matoorunneqarunik ersissanngillat isikkivilussaatinillu eqqaaniittoqassanani.
Tele Greenlandimi pisortaaneq Brian Buus Pedersen oqarpoq kabelinik siaartiterineq pilersaarutit malillugit ingerlasoq.
- Aap, piffissaliussaq eqqorlugu ingerlavugut, naatsorsuutigaarpullu kabeli siullleq Saqqarlernut septemberip aallartinnerani anngunneqarpat nalliuttorsiutigilaarumaarlutigu, Brian Buus Pedersen oqarpoq.
Saqqarlertigut napparsimavissuullu sissaatigut kablinik qaqitsisoqarnissaanut sillimarniarneq patsisaavoq, assersuutigalugu kabeli Saqqarlertigoortoq ajutuussagaluarpat Sanap kangerluaniittoq ingerlaannarsinnaassammat, killormullu. Tassa kabelip aappaa assaasunit aseruallanneqaraluarpaat aappaa ingerlaannarpat attaveqarniarnermi malugineqarsinnaasussaanngilaq.
Brian Buus ilanngullugu oqarpoq kabelit immap naqqaniit sissamut anngunneqarpata kussiniisalianullu siaariarlugit assaanneqarpata takuneqarsinnaassanngitsut. Taava kabelit nunap iluatigut timmut kabelinik katersuivimmut ingerlassapput. Katersuivissaq Nuummi Hans Egedep oqaluffiata ataani iliveqarfitoqqap eqqaani illoqarfimmi oqarasuaatinut centralit ilaanni allilaaginnakkami katersorneqassapput tassanngaaniillu nalunaarasuaatit oqarasuaatillu siaruarneqarsinnaassallutik.
Brian Buus ilanngullugu oqarpoq kabelimik siaarsiniarneq sioqqullugu nalaanilu Nunatsinni, Canadami Islandimilu aalisartut suleqatigiiffii attaveqarfigiuarlugit aalisarfiit aqqusaatorneqarsinnaanerat ilimagisariaqarmat. Tamatuma saniatigut siaarsiffimmiit aalajangersimasunik ungasissusilimmi kilisattoqannginnissaa aamma isumaqatigiissutaasimasut ilagaat. Tamatumunnga atatillugu kabelip sumiinneranik nalunaarutinik umiarsuarnut qanilleriaannarnut nassiussuisoqartuarpoq.
Mingutsitsisinnaaneq eqqarsaatigalugu aamma immani allani immap naqqatigut kabelilersuisarnerit paasinarsitissimavaat kabelit immap naqqatigut assaallugit siaakkat immap naqqani pinngortitamut annikitsuaraannaralaarsuarmik sunniuttartut.
Brian Buus Pedersen oqarpoq kabelinik attavilersuineq pillugu nassuiaasoqassasoq aggustip 19-ani 20-anilu. Septembarimi suliamut attuumassusilinnit peqataaffigineqartumik ataatsimeersuartitsisoqassaaq.
