Kaassuartakkaniittut isersinnaanngillat

Ilulissani Qaqortumilu kaassuartakkamik issiavillit pisortanut isersinnaanngillat.
Allattoq Else Løvstrøm
novembarip 02-at 2009 16:12

Karl Olsen Ilulissaneersup Frederik Jerimiassenillu Qaqortumeersup kaassuartakkamik issiaveqarnertik ataatsimuussutigiinnanngilaat, aammali pisiniarfinnut allaffinnullu isersinnaanngillat.

Akileraarnermut pisortaqarfik Ilulissani Qaqortumilu immikkoortortaarnikuuput kaasuartakkamik issiavillit iserfigisinnaanngisaannik. Uffa siorna Ilulissaneersoq sananeqartoq inatsisit 2007-imeersut malillugit innarluutilinnut tulluarsakkamik isertarfiligaanngilaq.

Aammali isertarfiliortoqartarpoq atorneqarsinnaanngitsunik matut amippallaaqimmata isertoqarsinnaanngitsoq. Frederik Jerimiassen oqarpoq aamma namminneq pisooqataallutik pissutsinut nipaappallaaqigamik. Peter Mikaelsen Kattuffimmi siulittaasoq ilaliilluni oqarpoq qisuariaateqarnerusariaqarlutik misissuinerusariaqarlutillu.

Ilulissani Pisiffik isaariaqaraluarpoq matulli qaninnerup qiversartui ima ikkusimapput matu ammaraangat kaamisartakkamiittut mattunneqartarlutik. Taamaattumik Karl Olsen Pisiffimmut iserneq ajorpoq. Upernaakkut aasakkullu silami utaqqiinnartarpoq allanillu pisiniunneqartarluni amigaatiminik.

Ilulissanili Pisiffik allannguinissaminut pilersaaruteqanngitsoq Søren Damgaard radioaviisimut oqarpoq. Aamma Qaqortumi Pisiffiup atisaarniarfianut kaamisartakkamik issiavillu pisiniarsinnaanngillat, tamannali iliuuseqarfiginiarneqarpoq ukiup tulliani alliliinermut iluatsillugu innarluutillit majuarfissaannik sanasoqassammat.