Kaassuartakkamik ingerlatillit aporfissaqaqaat
Isaarissanut qummukartarissat ajornartorsiutaajuarsimanerarpai.
- Taakkua ajornartorsiutaapput. Ukiuni taakkunani, soorlu uanga ukiut 21-t kørestolertuullunga nikeriartoqartaraluarpoq. Soorunami sanaartoraangamik ilannguttaraluarpaat, isaarissat rampimik taagortagaat, kisianni sanartukkat naammassineqaraangamik sivingavallaarlutik uagutsinnut atorpiarneqarsinnaaneq ajoramik. Allanit ikiortariaqalertarpugut taamaalilluta, nammineerusuikkaluarluta, Dorthe Olsen oqarpoq.
Uparuartuartaraluarlugit suneqarneq ajorneri assut ajuusaarutigaa.
-Sanaartortut eqqumaffigiartuleraluarpaat, kisianni kukkusumik suliarineqaraangamik atai atorpiarneqarsinnaannginnamik taamaalillutik ilaanni assiliaatinngortarput, Dorthe Olsen oqarpoq.
Sapinngissaminilli inuunermini aporfiginaveersaarniartarpai.
- Ajornartorsiutitut isigerusunneq ajorpakka, niaqorluutiginiarutsigit inuunerput unittuussammat. Ingerlaqqittariaqaratta inuunitsinni tamakku niaqorluutigerususaarsinnaannginnatsigit. Inuttulli allatullu ulluinnaqartariaqaratta.
Dorthe Olsen 1987-imili qitini napimmalli qamutinik ingerlateqalersoq taama oqarpoq.
Inuusuttunnguup Rita Christensenip 18-inik maanna ukioqartup ukioq qitini napigamiulli kaassuartakkanik ingerlateqalerpoq. Ukiarmi Sisimiunut utermat aporfissarpassui ataataata Poul Christensenip kommunimut Namminersornerullutillu Oqartussanut allagaqarluni oktobari qaammat naammagittaalliutigigaluarpai. Sulili akineqanngilaq.
- Suliaq inatsisartut ombudsmandiata tigummigaa tusarparput oktobarillu 30-anni Namminersornerullutik Oqartussat iliuuseqaqqugai tusarlutigu. Maannamulli akissutinik tigusaqanngilagut. Paaserusukkaluaqaarput, innarluutillit ulluinnarneranni inuunerannik oqinnerulersitsinissamut pisussaaffiit unioqqutinneqarneri kimit akisussaaffigineqarnersut. Tusarutsigu Sisimiut Kommuneat politiinut unnerluutiginiassagatsigu, Poul Christensen oqarpoq.
Ullumi ulloq decembarip ulluisa pingajuat nunarsuaq tamakkerlugu innarluutillit ulloraat, ullorlu taanna nunarsuatsinni innarluutillit atugaat pillugit paasisitsiniaaviusarpoq.
