Kaassassuk Silamiukkunnit isiginnaagassiarineqarpoq

Kaassassummik oqaluttualiaq Kalaallit Nunaanni meeqqat tamarmik nalugunanngilaat. Nukappiaraq nunaqqatiminit qinngasaarneqartuartoq, isumagineqarnerlu ajortoq.
Allattoq Mads Lynge
oktobarip 29-at 2010 17:20

Kaassassummillu oqaluttualiaq isiginnaartitsisartoqatigiinnit Silamiukkunnit maanna isiginnaagassianngortinneqarpoq, "Kaassassuk 2010"-mik taaguuserlugu.

Isiginnaagassiaq siullerpaamik unnugu takutinneqassaaq, isiginnaartitsisarfillu cirkusip isiginnaartitsisarfiatut isikkoqassaaq, inuillu akuliussinnaassallutik:

- Isiginnaartitsisartut isiginnaartut akornanniissapput, inuit akornanni isiginnartitsissallutik. Soorlulusooq Kaassassuk nunaqqatimi akornanniiginnallartoq, nunaqqataalu akuliukkusukkunik akuliussinnaapput. Pisunimmi takunnittuupput, akuliussinnaallutillu, Silamiuni aqutsisoq Svenn B. Syrin oqarpoq.

Taanna isiginnaagassiamik ilitsersuisuullunilu najoqqutassiortooqataavoq.

2010-mi Kalaallit Nunaanni meeqqat inuusuttullu sammissallugit Silamiut aalajangiusimavaat, Kaassassummillu isiginnaagassiaq tassunga atatillugu suliarineqarpoq.

Kalaallit Nunaanni meeqqat inuusuttullu sumiginnakkat "Kaassaassuk 2010"-mik isiginnaagassiornikkut immikkut ittumik sammineqarput:

- Meeraq Kaassassuttut misigisaqaruni, tassa sumiginnagaappat qinngasaarneqarpallu, Kaassassuk perorpat kingunissai ilisimanngilagut. Inuit ilanngui pissusissamisoortumik inooqataapput ilaalli akerlianik misigisaqarlutik, Svenn B. Syrin oqarpoq.

Isiginnaartitsisut tassaapput Ane Marie Ottosen, Mike Fencker Thomsen, Ujarneq Fleischer aamma Makka Kleist.

Isiginnaagassiaq "Kaassassuk 2010" Katuami unnugu takuteqqaarneqassaaq, soorlu aamma aqagu takutinneqassasoq, sisamanngorpallu novembarip ulluisa sisamaanni aamma takutinneqassalluni.

Taamalereerpat illoqarfinni allani aamma takuteqattaarneqarumaarluni.