Kaajallaasitaq Naalakkersuisut ilassinninnissaannut killiliisussaq

novembarip 23-at 2005 14:41

Imerniartarfinni tamataajartarfiusuneerujoornerit, imerniartarfinnilu akisuuni inuiaqatigiit akiligaannik sippuinerit killeqartinneqartussanngorput, tassami Namminersornerullutik Oqartussat ilassinninnermut kaajallaasitaliaa nutaaq saqqummerpoq.

- Naalakkersuisunit ilassinninnermut atorneqartarsimasut assut tusagassiutitigut sammineqartarsimapput, paasinarsisimavorlu immaqa pisariaqartoq erseqqinnerusunik malittarisassiuinissaq. Taannalu tassa uanga isumaqarpunga naalakkersuisut atorfillillu alanngaarsinnaasariaqassagaat una kaajallaasitaq, ilassinninnermut kaajallaasitaq nutaaq pillugu taama oqarpoq, Namminersornerullutik Oqartussani pisortaq Kaj Kleist.

Taama kaajallaasitamik nutaamik saqqummertoqarnissaa pisariaqalersimavoq, Naalakkersuisuusimasut Jens Napaattuup Rasmus Frederiksenillu aasaq ilassinnissutinik aningaasanik sippuerujussuarsimanerisa kingunerisaanik.

Kaajallaasitaq nutaaq tallimanik qupperneqarpoq, kaajallaasitamullu siullermut allaanerussutai qanormita ippat?

- Una siulleq quppernernik marlussuinnarnik qupperneqarpoq, taamaallaallu sumut atorneqarsinnaaneri allanneqarsimapput, imatullu erseqqinnerusumik ataasiakkaat pineqaratik. Taassuma saniatigut aamma ilanngullugu malittarisassatut atorsimavarput ilaatigut aamma naalagaaffimmi ilassinninnermi aamma atorneqartoq; tassalu tupanik piseqqusinnginneq naak taanna atorneqarsimanngikkaluartoq, kisianni erseqqissumik aamma taanna ilanngullugu allassimavarput imaalillugu ilassinninnermut aningaasartuutinit tupanik pisisoqarsinnaanngitsoq, Kaj Kleist oqarpoq.

Siornatigut Naalakkersuisoq 200.000 koruunit tungaannut ilassinnissutinut ukiumut atuisinnaatitaagaluarpoq, maannali 150.000 koruunit tungaannut ilassinnissutissat appartinneqarput. Taamatuttaaq ilassinnissutinik sinneqartoorniaraanni Naalakkersuisut siulittaasuat 1 millioni koruuninik sillimmateqartarpoq, taamaalilluni taakkununnga aamma qinnuteqartoqarsinnaalluni.

Kaajallaasitaq naalakkersuisunit suli atsiorneqanngilaq, aatsaallu sapaatip-akunnerata tulliani atsiortoqarsinnaanera ilimagineqarpoq.