Sønderjyllandimi iffiorfissuarmi teriarsuaqarpallaarnera eqqiluisaanngippallaarnerlu pissutigalugu Inuussutissalerinermut nakkutilliisoqarfiup ataasinngormat matusariaqareeraalu, Kalaallit Nunaanni Atuisartunut Siunnersuisoqatigiinnit taama mianersoqqusipput. Kaagit immuup qalipperneranik ilaqanngitsut, tassa tørkaget, aamma kaagit kilitaaqqat, snittet, iffiorfissuarmi tassani iffiorneqartarput. Tamakkulu ilaat Kalaallit Nunaanni aamma nioqqutigineqartarput, taakkuli nerineqarnissaat inassutiginanngilaq, iffiukkanimi taakkunani teriarsuit quui anaalu nassaarineqartarsimapput.
Atuisartunut Siunnersuisoqatigiit kaammattuutigaat kaagisiniaraanni nioqqutissiortup aqqa maluginiartaqqullugu. Kaagimmi niuertut amerlasuunngorlugit tunisisartut allatut atserlugit tunisarpaat, ilaasa Torps kagespecialitetimik taaguuteqartittarlugit, kisianni aamma nioqqutissiortup aqqa puuini allassimasarpoq. Kaagiuteqaraanni Jysk ndustribagerimeersunik, navianartuunerat pissutigalugu igiinnartariaqarput, taamaalioreeraannilu ilisivigisimasaat eqqiarluaqqissaartariaqarput, Atuisartunut Siunnersuisoqatigiit siunnersuipput.