K-33 naammagittaalliornianngilaq

Assammik arsaattartut klub-iata K33-p Kalaallit Nunaanni Assammik arsaattartut Kattuffiata aalajangigaa suliareqqitassanngortinnianngilaa, aalajangiinermi K-33-p angutini assammik arsaattartui angunniutivinnissamut pingasunngormat mattussaaneranik kinguneqarsimavoq, Kattuffiullu aalajangiinermini tunngaviginiarsimavaa K-33-p malittarisassat malillugit assammik arsaattartumik ilaaqqusaanngitsumik unaminermi peqataatitsisimanera.

Assortuussutaasoq tassaasimavoq unammisartoq kinaluunniit ulluni 30-ni unammersuarnermut peqataaniaruni Nunatsinneereersimasussaanera.

- Maannakkulli soqutaajunnareerpoq, pissartanngorniuttussat kikkuuneri nalunarunnaareermata taamaattumik suliareqqitassanngortitsissuterput tunuartiinnarparput, taama Radio Aviisimut, oqarpoq; K-33-p siulittaasua; Jens Peter Kielsen,

- Kalaallit Nunaanni Assammik Arsaattartut Kattuffiani ajuusaarutigaarput, K-33-p siulittaasuata, Kattuffik pappialarsornikkut nakkutiginnilluartuunngitsutut nipeqartinniarsarimmagu. Suliamimi uangi K-33-p uppernarsaatissat nammineq pingereertussaammagit, taama oqarpoq; Michael Mulvad.

Maannakkut K-33 Kalaallit Nunaanni Assammik Arsaattartut Kattuffianut allagaqarnialerpoq, unamminermi malittarisassat allanngortinneqarnissaannut imalimmik.

- Danmarki Kalaallillu Nunaat naalagaaffeqatigiipput, taamaattumik pissusissamisuunngilaq Europamisut ullunik 30-nik malittarisassaqarnissaq. Tamanna allanngortinneqartaria-qarpoq. Malittarisassammi malitsinneqarnerata imaalersimmagu, unammisartut inuusuttut qaammat ataaseq sioqqullugu atuarfimminniit qimagutereersimasassasut, tamanna allanngor-tittariaqarpoq inuusuttunut pitsaanerusussaq anguniarlugu, taama oqarpoq; Jens Peter Kielsen K-33-mi siulittaasuusoq.