Københavnimi seqinersiortut

januaarip 16-at 2005 14:49

Avannaani seqernup kingumut nueqqinnera kalaallinit Danmarkimiittunit uani sapaatip akunnerata ingerlanerani Københavnimi Christianshavnimi unnia nalliuttorsiutigineqarpoq.

Christianshavnimi innuttaasut illuata Kalaallit nunaata avannaanitorluinnaq seqernup kingumut nuinera nalliuttorsiutigissallugu aalajangersimavoq.

Aaqqissuussinerittaaq ilagisimavaat kalaalimeerniarfeeqqatut ittumik ”kalaaliaqqamik” taasinnaasatsinnik, neqinik aalisakkanillu tuniniaasoqarluni.

Christianshavnip illoqannginnersaani aliikkusersuinerit, saqqummersitsinerit, oqalugiarnerit oqaluttuartitsinerit allarpassuillu sapaatip akunnerata matuma ingerlanerani ingerlanneqarsimapput.

Tuniniakkat assigiinngitsorpassuit, nerisassat, ammit, sapakkat, tupilaat qilaatillu tuniniaavimmi Kalaaliaqqamik taaneqartumi tuniniarneqarsimapput.

- Isumassarsiaq tamanna pinngorpoq Christianshavnimi illoqannginnersami kalaalerpassuit naapittarfigisaanniit innuttaasut illuat qanittunnguummat, aaqqissuussinerlu kalaallinit soqutigineqassaqimmat. Taamaalilluni aamma qallunaat kalaallit kulturiannut tunngasumik siammasinnerusumillu paasisaqarnissaat siunertarineqarsimasoq, Christianshavnimi innuttaasut illuanni sulisoq David Nejrup Djarnel oqaluttuarpoq.

Aaqqissuussineq tamanna Københavnip kommuneanit aningaasaliiffigineqarpoq. Aaqqissuussinermi nammineq piumassutsiminnik ikiuuttoqarpoq, ilaatigut kalaallit illuiniit Kofoed Skolemiillu.

- Aaqqissuussineq iluatsilluarpoq, tusarnaartitsinermut oqalugiarnernullu soqutiginnittut amerlasimaqaat, David Nejrup Djarnel oqaluttuarpoq.