Københavnimi qineqqusaalerput

Partiit sisamat inatsisartunut qinersinissamut Københavnimi qineqqusaarniarput pingasunngorneq februaarip 27-at. Inatsisartunut qinersinissamut kalaallit Danmarkimi najuallit qinersisinnaasut 5-600-uupput.
Allattoq Noah Mølgaard
februaarip 23-at 2013 10:33

- Kalaallit Danmarkimi ilinniagaqartut taaseqataanermikkut Inatsisartuni inissani marlunnik pingasunilluunniit nikisitseqataasinnaapput, Københavnimi Kalaallit Illuutaanni paasissutissiinermut ataqatigiissaarisoq Søren Thalund KNR.gl-mut taama oqarpoq.

Kalaallit Illutaat ilinniagaqartullu peqatigiiffiat Avalak suleqatigiillutik Løvstrædemi Kalaallit Illuutaanni qineqqusaartitsinissaq pingasunngornermi februaarip 27-at nalunaaqutaq 19.00 pisussaq aaqqissorpaat. Tassani Siumut, Inuit Ataqatigiit, Demokraatit aamma Atassut qineqqusaarumminnik saqqummiussiniarput.

Partiit Københavnimi qineqqusaaqataanissaat iluatsippoq Future Greenland pillugu Nuummi aaqqissuussinermi. Tassani Avalammi siulittaasoq Hans Peder Kirkegaard peqataanini iluatsillugu Inatsisartuni partiit allaffiinut siunnersuummik saqqiussivoq tamannalu tassa ilalerluarneqarpoq.

Kalaallit Illuutaat qineqqusaarfiussaaq tassanilu oqaatsit sorliit atorusunnerlugit tusarnaariat toqqarsinnaavaat.

- Oqaatigineqartut tamaasa nutsissagaanni piffissarujussuaq atorneqartussaavoq. Taamaammat najuuttut periarfissippagut oqaatsit atorusutatik atorlugit saqqummiussinissaannut oqaatsillu atukkatik malillugit akineqartarumaarlutik. Kisianni tassa nutserisoqassanngilaq, Søren Thalund oqarpoq.

Partiit qineqqusaarutitik saqqummiutissavaat tamatumalu kingorna oqallisissallutik. Qineqqusaarneq naggaserlugu qinersisartut apeqquteqarsinnaatitaassapput.

Kalaallit Danmarkimi ilinniagaqartut peqqissartullu allakkatigut qinersisinnaapput. Taamatuttaaq aamma kalaallit Savalimmiuniikkallartut periarfissaqarput. Taakku inuit nalunaarsorsimaffiannut saaffiginnissaput imaluunniit Københavnimi Namminersorlutik Oqartussat allaffeqarfiannut taasiartorsinnaarlutik.