Københavnimi kalaallit suliffeqanngitsut EU-mit ikiorneqalerput

Københavnimi kalaallit suliffeqanngitsut suliffissaannik neqeroorfiginnittarneq EU-mit aningaasalersorneqartoq nutaaq aallartippoq. Suliniut Qaami ukiup affaa sinnerlugu ingerlanneqassaaq pikkorissaqataasullu inuttut ineriartornermi peqataatinneqassapput, danskisut ilinniartinneqassallutik, siunnersorneqatassallutik suliffissarsiornerminnilu imminut neqeroorutiginissaminnut sungiusarneqartassallutik.

Suliniummi pisortap siunnersuisartullu, Klaus Ebbesenip Danmarkimi oqaatsit pillugit oqallittoqarnerata nalaani isumassarsisimavoq taamatut aallartitsisoqartariaqarneranik.

- Kalaallit Danmarkimiittut danskisut oqalussinnaanngitsut aasaq oqallisaaleruttullarmata ilaatigut aningaasanik ikiorsiisarnissaq siunnersuutigineqarmat isumaqataanngilanga. Isumaqarpungali aningaasanik ikiorsernagit allatut ikiorneqartariaqassasut, Klaus Ebbesen oqarpoq.

Kalaallit Danmarkimiittut eqqartorneqaraangata inuttut ajornartorsiutigisartagai amerlanertigut eqqaaqqajaaneqartartut, tamanna qanoriliuuseqarfiginiarneraat Klaus Ebbesenimut apeqqutigaarput, akivorlu:

- Tamanna maluginiarsimavarput. Taamaattumillu aningaasaateqarfiit inunnik sullissisut apeqquteqarfigisimagut aningaasanik tapersinnaaneraatigut. Aningaasat inuup pissusiinik ilisimatuup kalaallip aningaasarsiassaatut atorniarlutigit, Klaus Ebbesen oqarpoq.

Apereqqipparput ukiup affaa taamatut ikiorsiinermut atussallugu naammassanersoq, akivoq:

- Paasinarsissappat sullitarput sivisunerusumik pisariaqartitsissasoq arlaatigut aaqqiviginiassuarput.

Klaus Ebbesenip siornatigut Danmarkimut nunasisut suliffissaqartinniarlugit sullitarsimavai. Kalaallit suliffissaaleqisut nuna allamiunut naleqqiullutik allaanerusutut taassuma nalilerpai.

- Danskisut oqalussinnaasugunik inuiaqatigiit danskit ilisimasarfigalugit oqaluttuutissagaluarpaatigut. Nunasisunut allanut naleqqiullutik allaanerummata erinigeqqaara pikkorissarlutik aallartinnissaat, Klaus Ebbesen naggasiivoq.

EU-p inunnik ikiuiniarluni aningaasaateqarfia suliniummut 2 million koruunit missaannik aningaasaliissuteqarpoq. Københavnimi Kalaallit Illuanni suliniut arfininngorpat aallartissaaq.