Københavnimi kalaallit angerlarsimaffeqanngitsut ikiorneqarnialerput
Københavnimi kalaallit angerlarsimaffeqanngitsut kommunip angerlarsimaffeqanngitsunut neqeroorutai atorusunneq ajorpaat, tamanna nalunaarusiami qaammatit pingasut matuma siorna saqqummersumi takuneqarsinnaavoq.
Kalaallit atugarliortut angerlarsimaffeqanngitsullu nunaqqatiminnik ataatsimooqateqartarnissartik pingaaruteqartittorujussuugaat nalunaarusiami erseqqissarneqarpoq. Tamanna tunngavigalugu oqqiffiusinnaasunik neqerooruteqartoqartariaqarpoq.
Københavnimi inunnik isumaginninnermut borgmesterip Mikkel Warmingip tamanna malugisimallugu ima oqarpoq:
- Assigiinngitsunik oqqiffiusinnaasunik neqeroorusiorsinnaanerluta misissuivugut. Tamatumunnga ilanngullugu taakku imminnut ataqatigiisinneqarsinnaanersut misissorparput; assersuutigalugu oqqiffimmukartarneq sungiunneqariarpat ataatsimoorussami sungiusartarfimmiittoqarsinnarluni initaarnissamut sungiusarfiliorsinnaanerput periarfissaqarnersoq misissuiffigaarput, Enhedslistimeersoq Mikkel Warming oqarpoq.
Københavnip Rådhusiani ippassaq kalaallit angerlarsimaffeqanngitsut pillugit Mikkel Warming ataatsimeeqataavoq. Inuttut ineriartortitsivimmit ataatsimiinneq aaqqissuunneqarsimavoq kalaallinillu atugarlioortunik sullissisut 50-t missaaniittut ataatsimiinnermi aamma peqataapput.
Isumaginninnermut ataatsimiititaliami ilaasortat oqqiffiusinnaasut ukiaru ataatsimeeqqittalerunik eqqartussavaat. Kalaallit atugarliortut ataasiakkaat inummik tapersersortitut pisariaqartitsillutik attaveqarfigisartagassannut atugassanik Københavnip kommunea inunnik isumaginninnermut ministereqarfimmut aningaasanik qinnuteqassaaq. Taamatut qinnuteqarnissaq marluinnik siunertaqartoq Københavnip kommuneani isumaginninnermut borgmesterip Mikkel Warmingip ima oqaluttuaraa:
- Siullertut kalaallit atugarliortut ikiorneqarnissaminnik pisariaqartitsinerat naapertorlugu ikiorneqartarnissaat anguniagaavoq taassumalu saniatigut taakkunannga ikiueriaaserput qulaajaaffigisussaallutigu. Qulaajaasoqareerpat sanngiiffigisagut nukittorsartussaassavagut, soorlu assersuutigalugu oqaatsinik kulturimillu ilinniartoqarsinnaavoq, Mikkel Warming naggasiivoq.