- Coronavirusimik tunillatsissimasut akornanni inuusuttut amerlanerussuteqarput. Københavnimimi inuusuttut 26 procentii tunillatsissimammata, danskit peqqissutsimut ministeriat Magnus Heunicke (S) oqarpoq.Assi: Mads Claus Rasmussen/Ritzau Scanpix

Københavnimi inuusuttut coronavirusimut juullinnginnerani misissortissasut

Inuusuttunik coronavirusimut juullinnginnerani misissuisussat amerlissavagut, danskit peqqissutsimut ministeriat Magnus Heunicke oqarpoq.

Danskit naalakkersuisui pingasunngorpamiit immikkut suliniuteqalissapput. Tassa Danmarkimi illoqarfiit pingaarnersaanni kommunini 17-ini inuusuttut 15-it 25-llu akornanni ukiullit coronavirusimut juullinnginnerani misissortissapput.

Danskit peqqissutsimut ministeriat, Magnus Heunicke (S), tusagassiortunik marlunngornermi katersortitsinermi taama oqarpoq.

- Kommunini taakkunani inuusuttut tamarmik juullinnginnerani misissorneqarnissaat qulakkeerumallugu misissuisussat amerlissavagut.

- Kommunini taakkunani inuusuttut 200.000-t tungaannut amerlatigisut misissortissapput. Ilinniarfinnullu misissuiartortoqartarnissaanut sapinngisamik iliussaagut, taanna oqarpoq.

AAMMA ATUARUK Danmarkimi coronavirusimik tunillatsissimasutut siumorneqartut 1468-iusut - tunillatsissimasut akornanni qulingiluat toqusimasut

Coronavirusimik tunillatsissimasutut siumorneqartut akornanni inuusuttorpassuummata immikkut suliniuteqartoqartussanngorput.

Københavns Kommune Frederiksberg Kommunelu kommuninut 17-inut misissuiffiusussanut ilaapput.

- Coronavirusimik tunillatsissimasut akornanni inuusuttut amerlanerussuteqarput. Københavnimimi inuusuttut 26 procentii tunillatsissimammata.

- Nalunngilara ullut artornartorsiorfiusuusut. Ikinngutimaarnerit ataatsimuualaarnerillu amigaataapput. Qanillattornaveersaarnissamulli ikioqatigiinnissarput ikioqatigiinnitsinnillu attassinissarput pingaaruteqarluinnarpoq. Pingaartumik coronavirusimut akiuussutissaqalingajalernera eqqarsaatigalugu, Magnus Heunicke oqarpoq.

AAMMA ATUARUK Peqqissutsimut ministeri: Tamat coronamut akiuussutissamik neqeroorfigineqassapput

Inuusuttut kajumissaarneqartut, peqqissutsimut ministeri erseqqissaavoq, inuusuttullu taamaaliorumaartut taanna neriuppoq. Tassa imaappoq, inuusuttut peqqussuteqarfigineqanngillat.

Inuusuttunik misissuinerit pingasunngorpat aallartissapput - taakkualu Ishøj Kommunemi Brøndby Kommunemilu aallarnerneqassallutik.

Danskit peqqissutsimut aqutsisoqarfiata pisortaata, Søren Brostrømip, tuniluunnerup siaruaakkiartuinnarnera aarleqqutigineqarmat suliniutit isumatusaarnermik aallaaveqartutut nalilerpai.

- Coronavirusip Københavimi sumiiffinnut allanut sanilliullugu tuniluunnerunera aarlerinartuuvoq, taanna oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat