Københavnimi ilinniarnertuunngorniarfik matusoq: Ilinniartut marluk coronavirusimik tunillatsissimasut
Danmarkimi napparsimasut isumannaatsuunissaat pillugu aqutsioqarfik taama paasissutissiivoq.
Ilinniarnertuunngorniarfimmi ilinniartut ataasinngornermi takkutinnginnissaannik piumaffigineqarrput.
Tamanna ilinniartut marluk, imminnut atassuteqanngitsut coronavirusimik tunillatsissimanerannik pissuteqarpoq. Ilinniarnertuunngorniarfik napparsimasut isumannaatsuunissaat pillugu aqutsioqarfiup oqaloqatigiissuteqarfigineratigut matuneqarpoq.
AAMMA ATUARUK Kalaaleq sisorartartoq Italiami coronavirusimik tunillatsittoq
Tunillatsissimasut marluk ilagisimasaat angerlarsimaffimminnit aneqqusaajunnaarsinneqareerput.
- Sapaatit akunnerini kingullerni ilinniarnertuunngorniarfimmi Rysensteenimiissimasut tamarmik coronavirusip ersiutai maluginiartariaqarpaat, napparsimasut isumannaatsuunissaat pillugu aqutsioqarfiup pisortaa, Anne-Marie Vangsted oqarpoq.
Tamatuma sanitigut ilinniartut eqimattani amerlasuukkaartuniinnaveersaarnissaat kaammattuutigineqarpoq. Ilinniarnertuunngorniarfimmi ilinniartut 1000-it missaanniipput.
Ilinniartoq ataaseq coronavirusimik tunillatsissimasoq sapaatip akunnerata aallartinnerani paasineqarpoq, allalu sapaatip akunnerata naanerani paasineqarluni. Politiken taama allaaserisaqarpoq.
AAMMA ATUARUK Arctic Winter Games aflyst på grund af frygt for corona
Ilinniartoq ataaseq tunillatsissimasoq paasineqareersorlu ilinniartorpassuit ilinniartitsisorpassuillu atuarfimmit aneqqusaajunnaarallarput. Ilinniartorli alla tunillatsissimasoq paasineqarmat ilinniarnertuunngorniarfik matugallarneqarpoq. Qaqugu ammaqqinneqassanersoq ilisimatitsissutigineqanngilaq.
Ilinniartulli nittartakkatigut ilinniartinneqassasut, Rysensteen Gymnasiumip pisortaata, Gitte Transbølip ilisimatitsissutigaa.
- Ilinniarnertuunngorniarfiup matugallarneqarnera nittartakkatigut ilinniartitsinermik pikkorissalertupallattariaqarnitsinnik malitseqarpoq.
Danmarkimi inuit coronavirusimik tunillatsissimasut katillugit 59-iupput. Tunillatsissimasut 14-inik amerlisimasut sapaatip akunnerata naanerani paasineqarpoq.
