Københavnimi arnaq Kinameersoq coronavirusimik tunillatsissimanngitsoq

Danmarkimi Peqqissutsimut Qullersaqarfik tusagassiuutinut taama allaaserisaqarpoq.

Arnaq pineqartoq influenzartutut pasineqarluni Københavnip mittarfissuanit ambulancemik aaneqarpoq, coronavirusimilli tunillanneqarsimanngitsoq maanna paasinarsivoq.

Arnaq pineqartoq inimut nalinginnaq iserfigineqaqqusaanngitsumut inissinneqarpoq kingornalu misissorneqarluni.

AAMMA ATUARUK Kiinamiu Hvidovre Hospitalimi mattunneqarallartoq

Coronavirusimik tunillanneqarsimasumik Danmarkimi taamaasilluni suli siumuisoqanngilaq. Peqqissutsimut Qullersaqarrfik naapertorlugu coronavirusimik Danmarkimi tunillatseratarsinnaaneq aarlerinaateqarpallaanngilaq.

Coronavirusimillu Danmarkip mittarfiini tunillanneqarsinnaanissaq aarlerinaateqarpallaanngitsutut nalilerneqarpoq, ernumasoqartariaqanngitsorlu nalunaarutigineqarpoq.   

Inuk alla coronavirusimik tunillatsissimasutut pasineqartoq taamatulli tallimanngornermi unitsinneqarpoq. Taassuma misissorneqarnerani inernerit suli utaqqimaarneqartuarsinnarput. Inerneri tallimanngornermi unnukkut saqqummiunneqassangatinneqartut, Peqqissutsimut Qullersaqarfimmi pisortaq, Thomas Brostrøm, TV2-mut taama ilisimatitsivoq.

AAMMA ATUARUK Danmarkimi inuk alla coronaviruseqarsorineqartoq aamma misissorneqalersoq

Hvidovre Hospitalip attaveqatigiinnermut pisortap, Hanne Ida Alsbirkip oqarnera naapertorlugu coronavirusimik tunillatsissimasutut pasineqartut marluusut imminnut attuumassuteqanngillat.

Arnaq Kinameersoq mittarfimmut tikikkami mittarfimmi sulisut inuummarliornerarluni saaffigisimavai.

Mittarfimmiinnini tamaat tunillatsinnissamut illersuummik assiaquteqarsimavoq.

Arnaq taanna Kinap kippasissuani illoqarfiit ilaanniit Chengdumiit timmisartorsimavoq.

Timmisartoq ilaaffigisaa Københavnimut nalunaaqutaq 7.40 tikittussaq Finlandimi illoqarfiit pingaarnersaannut, Helsinkimut, aqqusaarluni meqqaarsimavoq. Kinami timmisartuutileqatigiiffiup Sichuan Airlines timmisartumik taassuminnga piginnittuuvoq.

Arnaq Kinameersoq mittarfimmi tikittarfik 3-miissimavoq. Tikittarfik taanna arnap Kinameersup tikinnerata kingorna oqartussat peqqusutaat naapertorlugu assersorneqarlunilu eqqiarneqarpoq.

Nualluummik nappaateqartutut takussutissaqaraanni nappaammik coronavirusimik Kinaminngaanneersumik tunillatsissimanermut ersiutaasinnavoq.

Kina coronavirusimik maannamut nappaalaffiunerpaavoq, virusimillu toqquteqartut maannamut 600-nit amerlanerupput.

Coronavirusi Kinami illoqarfissuit ilaannit wuhanimit millionilikkaanik innuttaasulimmit tuniluuppoq.