Jørn Utzon toquvoq

Danskeq illussanik titartaasartoq, nunarsuaq tamakkerlugu tusaamasaq, Jørn Utzon, 90-inik ukioqarluni toquvoq. Aviisimi Politikenimi taama allaaserinnittoqarpoq. Jørn Utzon uummamminik unnuaq unittoorluni toqukkut qimaguppoq.
novembarip 29-at 2008 14:03

Illorsuaq Operamik tusarnaartitsisarfik, Operahuset, Australiami illoqarfiit pingaarnersaanni, Sydneymiittoq, titartaramiuk Jørn Utzonip tusaamasaassutigilerpaa.

Naalagaaffiit Peqatigiit ilinniartitaanermut, ilisimatusarnermut kulturimullu Suleqatigiiffiata, Unesco-p, allattuiffianut illorsuaq siorna ilannguppoq, tassaammanngooq ”eqqumiitsuliaq inuup suliaa kusanassutsimigut nallerneqarsinnaanngitsoq”.

Illussanik titartaasartut allat Jørn Utzon tassaanerartarpaat inuk piginnaanilissuaq, tamatigoortoq, soorlu Illussanik titartaasartut atuarfianni ilisimatooq, Tage Lyneborg, oqarsimasoq, Jørn Utzon tassaasoq ” inuk nunarsuarmut tunissutit pitsaanersaat”, aamma ”illussanik titartaasartut annersaat, ukiuni 20 hornorujukkunni pikkorinnersaq”.

Operahusip saniatigut, Danmarkimi Helsingørimi illut Kingohusit, Bagsværdimi Oqaluffik aamma Fredensborg Jørn Utzonip titartarsimavai.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq