Jørn Riel atuakkioqqippoq

Oqaluttuallaqqissorsuaq Jørn Riel Kalaallit Nunaannit aallaaveqartumik atuakkioqqippoq. "Den Lange rejse" angalanersuarmik kalaallisut taaneqarsinnaasoq, nukappiaqqamut, Leivimut, Kalaallit Nunaata eqqaani umiiartumut kalaallinilli meeqqanik marlunnik annaanneqartumut tunngassuteqarpoq.
Allattoq Gedion Storch
aggustip 29-at 2011 12:43

Atuakkiap nangeqattaartuliap Drengenip, inoorusuttup 1979-imiit 1980-imut pingasoriarluni saqqummersinneqartup nanginneraa. Atuakkat sisamaanni naggataannilu Leiv Vinlandimut tikippoq.

Atuagaq naqiterisitsisarfimmit Lindhardt aamma Ringhofimit saqqummersinneqarpoq. Jørn Rielip atuakkiaasa pingaaruteqarnersaat Sangen for Livet - Inuunerup Inngerutaa - nunap inoqqaavisa nunarsuup pinngoqqaarneranik kinguaariillu oqaluttuarisaaneranik oqaluttuaq, kiisalu Rielip oqaluttuaaraliai pisimasuusaartitat naqiterisitsisarfimmit aamma naqeqqinneqarnikuupput.

Atuakkiortoq 80-ileeqqammersoq Tunup Avannaarsuanut ilisimasassarsiornermut peqataareerluni manna uteqammerpoq. Tassanilu aamma ukiut 60-it matuma siorna, Ella Ø-mi angalasunut pisortaalluni siniffitoqqamini sineqqikkallarujoq.

- Allanngorsimanngilluinnarpoq. Madrassi taannarpiaavoq itersiorneriluunnit nikissimanngillat. Aammattaaq issiavissuup ajorinngujuitsui arlallit ajortunngornikut aamma suli tassaniippoq, Jørn Riel Nordjyskemut oqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq