Jørn Riel akissarsitinneqarpoq
Qallunaaq atuakkiortoq Jørn Riel, Tunup avannaani pisimasuusaartitanik atuakkiortutut Nunatsinni ilisarimaneqarluartoq, Det Danske Akademimit nersornaaserneqartussanngorpoq.
septembarip 28-at 2010 10:46
Nersornaaserneqarnermi saniatigut aningaasanik 300.000 koruuninik akissarsitinneqassaaq.
Nersornaasiisut Akademiimeersut tunngavilersuutaat malillugu Jørn Rielip oqaluttuarusussusaa inuppalaassusaalu qungujunnartoq atukkiarpassuini takuneqarsinnaasoq nersornaasiinermut tunngavilersuutit ilagigaat, aviisi Politiken taama allaaserinnippoq.
Jørn Riel 79-inik ukioqartoq siusinnerusukkut allanik akissarsitinneqartarnikuuvoq, soorlu Boghandlernes Gyldne Laurbær aamma Naalagaaffiup Eqqumiitsuliornermut aningaasaateqarfianit inuunermi sinnera pisartagaqartussatut tunineqarnikuulluni. Atuakkiaa siulleq ateqartoq 'Mine fædres hus' 1970-mi saqqummersinneqarpoq.
Akademip ukiumoortumik naapinneranni novembarip 26-ani pisussami, nersornaasiineq pissaaq.
