Jørgen Wæver kommunimut qinigassanngortinniarpoq
Kommunimut apriilip aappaani qinersinissamut atatillugu politikkimut uteqqinniartumik nalunaaqqittoqarpoq. Siullermik Ole Dorph Siumut tunuliaqutaralugu Qaasuitsup Kommuniani qinigassanngortinniarluni nalunaarpoq. Maannalu Jørgen Wæver Johansen Kommuni Kujallermi kommunimut qinigassanngortinniarluni aalajangersimalluni nalunaarpoq.
Kommunerisaa suliffissaaleqinermik annertuumik eqqugaasimavoq, tamannalu kommunalbestyrelsitaassamut unamminartut ilagisussaassavaat.
- Maani nunap immikkoortuani avataaneersut uagullu pilersaarutitta piviusunngortinniarneqarnissaannut avataaneersunik aningaasaliisoqarnissaa ukiuni aggersuni immikkut sammineqartussaassaaq, peqatigitillugulu najukkami sulisartuvut periarfissanut nutaanut najukkamilu inuussutissarsiornissamut periarfissat nutaat piareersartussaassallutigit, Jørgen Wæver Johansen oqarpoq.
2007-mi politikkimit tunuarpoq, maannalu sassaqqikkusulersimalluni.
