Jørgen Wæver Johansenip inerniliineq eqqissiallaatigaa

- Uagut aallaqqaataaniilli oqartuaannarsimavugut arlaannaatigulluunniit kukkusoqaranilu inatsisinik unioqqutitsisoqanngitsoq, Jørgen Wæver Johansen. Suliamik inerniliineq eqqissiallaatigalugu oqarpoq.

- Nuannernikuunngeqimmat, taamatut tunngavissaqanngittumik pasillerneqarluni, Jørgen Wæver Johansen oqarpoq.

Pisortat illuutaannik akikinaaraluni illusisarsimanerit innuttaasunit aalassassimaarutigineqarput. Ileqqorissaarnerunngitsumillu isigineqartarluni, tamannali Jørgen Wæver Johansenip ilumoortuunnginnerarpaa.

- Inatsisit periarfissiissutaasa iluanni atuisut tunngavissaqanngittumik pasillerneqartussaanngillat. Inatsisit equngassuteqarsimappata, taava inatsisartut aqqutigalugit inatsisit pineqartut iluarsiniarneqartarput. Kisianni inatsisinik pioreersunik inatsisartullu akuersissutaannik atuisimasut tunngavissaqanngittumik pasillerneqartussaanngillat, Jørgen Wæver Johansen oqarpoq.

- Taava illusisimanerit peqqissimissutigisimanngilat?

- Soorunami uatsinnut akisusimaqaaq. taamatut illusisimanitsinni pasilleqarnerup tungaatigut. Kisianni malittarisassat maleqqissaarlugit illusisimaneq ingerlanneqarnikuuvoq, misissuinerillu sukumiilluinnartut inernerimmassuk eqqissiallaatigeqaara, Jørgen Wæver Johansen oqarpoq.

Inuit Ataqatigiit sinnerlugit inatsisartunut ilaasortaq Johan Lund Olsen inerniliineq oqaaseqarfigerusunngilaa.