Jørgen Wæver Johansen pakatsivoq
Mittarfimmut aningaasaliissutit 2014-imut aningaasarqarnermut inatsisissami siunnersuummi immikkut inissisimalluni tapiiffigineqalinngilaq - Qaqortulli mittarfia Assartuussineq pillugu isumaqalioqatigiissitap innersuussutaani peqataatinneqaraluarpoq, misissuiffigineqarnissaa peqataatinneqarluni. Ilaatigut tamassuma iluanni Nuummi talittarfissaq ilaatinneqarpoq.
Assartuussineq pillugu isumaqalioqatigiissitap misissueqqaarnerni 25 millionit koruunit immikkoortippai.
Tamanna Kommune Kujallermi borgmesterip ernumassutigaa.
- Qaqortup mittarfissaata nalornerpaluttumik aningaasaqarnermut inatsisissami siunnersuummi ilanngunneqarsimanera eqqarsaatigalugu, qularluta Nunarput ineriartortissanngilarput taamaattumik qularpalunnginnerusumik oqaasertaliinissat pisariaqartippavut.
Kommune Kujallermi borgmesteri, Jørgen Wæver Johansen oqarpoq.
Isumaqarporli misissueqqissaarnerit naammattut, aningaasat 25 millionit koruunit aappaagumut aningaasanut inatsisissatut siunnersuummi taakkununnga immikkoortinneqarsimammata.
Aningaasat taakku sanaartugassanut assigiinngitsunut 2015-ip tungaanut agguataarneqartussaapput.
Jørgen Wæver Johansen isumaqarpoq neriorsuutinik eqquutitsinnginnerusoq.
-Takusinnaasakka naapertorlugit mittarfik 2017-imi naammassineqarnissaa angujuminaappoq. Soorunami Kujataani tamatta eqqaammavarput partiit amerlaqisut aamma amerlanerussuteqartunik inatsisartuni ilaasortaatitallit paatsoorneqarsinnaanngitsumik neriorsuinikuummata. Qaqortumi mittarfiliornissaq aallartinneqarnissaa aammalu ingerlanneqarnissaanut neriorsuinikuummata. Soorunami naatsorsuutigaarput partiit taakkua qinersisartunut neriorsuutitik piviusunngortikkumaaraat, Jørgen Wæver Johansen oqarpoq.
Attaveqarnermut naalakkersuisup Steen Lyngep oqaatigaa neriorsuinerlunnerunngitsoq. Naalakkersuisut
Qaqortumi mittarfittaarnissaq tunngaviusumik isummiunnikuummassuk. Sanaartornerli aallartinnginnerani suna tamaat inissinneqaqqaartariaqartut aamma oqaatigaa.
-Allanngortoqanngiivippoq. Kisianniliuna inuit paasissutissanik pisariaqartitsisimagamik taamatut ernumasut, kisianni tunngavissaqanngilaq. Ernumanatik naalaaginnassavaat 2014-imi aaliangiinissamut tunngavissanik paasissutissanik massakkut suliaqaratta.
Qaqortumi mittarfittaassaq 2015-imut aningaasanut inatsisissami ilaatinneqarsinnaasoq Steen Lyngep oqaatigaa.
