Jørgen Wæver Johansen naalakkersuisutut tunualerpoq

Ineqarnermut Attaveqarnermut Aatsitassanullu Naalakkersuisoq Jørgen Wæver Johansen namminersornerullutik oqartussat inuussutissarsiutitigut siunnersuisarfianni Greenland Venture-mi pisortanngortussanngorpoq. Tamanna ullumi qulakkeerneqarpoq, Jørgen Wæver Johansen-ip naalakkersuisutut tunuarniuteqarnini naalakkersuisut siulittaasuannut ilisimatitsissutigimmagu. Jørgen Wæver Johansen januaarip naalernerani naalakkersutut tunuarniarluni nalunaarpoq. Sermitsiap nittartagaani allaaserineqartoq malillugu Jørgen Wæver Johansen februaarip ulluisa 15-ianni siunnersuisarfimmi Greenland Venture-mi Maniitsumi inissisimasumi sulilertussaavoq. Siunnersuisarfik Greenland Venture sulliffeqarfiuvoq Niuerneq siunertaralugu siunnersuissalluni aningaasaliissuteqassallunilu.

Ullut 14-it matuma siornatigut radioavisimi ilanngupparput Jørgen Wæver Johansen allamik suliffittaartussaasoq taamanili tamanna pillugu oqaaseqarusussimanngilaq, ullumili aatsaat tamanna qularnaarlugu nalunaarutigaa. Naalakkersuisup Jørgen Wæver Johansen-ip naalakkersuisutut tunuarluni allamik suliffittaarniarnermini tunngavilersuutigaa, naalakkersuinermik suliaqarniaraanni inuussutissarsiutitigut misilittagaqarnissaq pingaaruteqartoq, tamannalu maannakkut piffissanngorsorigamiuk tunuarluni. Ilanngullugu Jørgen Wæver Johansen-ip erseqqissarpaa, naalakkersuisooqatigiinneq ingerlalluartoq, Hans Enoksen-ilu suleqatigiilluarsimallutik.