Jørgen Fleischer: Augo Lyngetulli nakimaatsigaat
- Qularinngilluinnarpara Folketingimi Nunarput sinnerlugu issiatissariumaakkavut marluk saamerlerneertussaassasut, Jørgen Fleischer oqarpoq. Taamaasillunilu ullualuit matuma siorna misissueqqissaartarfiup HS analysip Sermitsiaq.ag-llu suliaat isumaqatigalugu oqarpoq.
Taassuma neriuutigaa arnat taakku marluk qinigaassangatinneqartut, Sara Olsvig Inuit Ataqatigiinniit, kiisalu Doris Jakobsen Siumumiit Folketingimut iserunik qineqqusaarutitik puigussanngikkaat, qularinagulu arnat taakku marluk pakatsisitsinavianngitsut, tamarmik piumassuseqarpalaarmata.
- Nammineq inuusuttuunikuuvunga, nalunngilara inuusuttuulluni sulerusussuseqarluni nukissaqarnartuusoq, allannguerusussusermillu pigisaqarneq ersarittarpoq, taamaattumik qularutiginngilluinnarpara sulissatik naammassilluarsinnaassagaat, Jørgen Fleischer oqarpoq.
Nammineq isumaqarpoq nunasiaanerup nalaani inuusuninngarnit, ullutsinni inuusuttut politikkeriusut ersarissumik, pitsaasumillu anguniaqarnerat maluginiagassaasoq.
- Ullutsinni inuusuttut piumassuseqarluarput, imminnullu upperilluarlutik, tamanna nunasiaanerup nalaani ersarivissimanngilaq, Jørgen Fleischer oqarpoq.
Ukiorpassuarni politikkikkut qanimut malinnaasarsimanermini, Folketingemut tunngassutilimmik ataatsimik puigunngisaannagassaminik eqqaamasaqarpoq.
- Taamanikkut eqqaamalluinnarpara, uanga ilinniartitsisorisimasara tassalu Augo Lynge Frederik Lynge ilagalugu Folketingimut iseqqaarmat. Taamanikkut inuusuttunnguuvunga assorsuarlu tupaallatsitsinikuupput, ingasammik Augo Lynge nunatta oqaluttuarisaanerani siullersaasorivara sakkortuumik isummersinnaassusilik, inullu nakimaalluinnartoq allanngoriartornermillu aallartitsisoq, Augo Lynge oqarpoq.
Taamaattumik qularutiginngilluinnarpaa nunatsinni arnat marluk Folketingemut siulittuutigineqartut qinigaassappata, Nunatsinni Folketingemut ilaasortareqqaartutut Augo Lyngetut nakimaatsigiumaartut.
