Jyllandsposten pinngitsuutitaavoq

Aviisi Jyllandsposten muuamaat ilaarlugu titartakkanut aqqaneq-marlunnut atatillugu mamarliisimasutut ajuallatsitsisimasutullu Århusimi eqqartuussivimmi ullumi pinngitsuutinneqarpoq.

Eqqartuussinerup inernera ajunngilluinnarpoq, Jyllandspostenip akisussaalluni aaqqissuisua oqarpoq.

Taassuma eqqartuussinerup inernera tupaallaatiginngilaa.

- Allatut inerneqarsimasuuppat nunami maani naqisimaneqarani tusagassiorsinnaanermut kingunipiloqarsimassagaluarpoq, aaqqissuisoq oqarpoq.

Muuamaat ilaarlugu titartakkat ukiup ataatsip matuma siornagut Jyllandspostenimi saqqummiunneqarmata nunarsuarmi tamarmi muslimit ajuallatsinneqarlutillu kanngunarsarneqarput. Tamannalu nunarsuarmi muslimeqarfiusuni tamani akerliussutsimik takutitsinernik, danskit tunisassiaannik pisiumajunnaarnernik danskillu aallartitaqarfiinik ikuallaasaqattaarnernik kinguneqarpoq.

Taama pisoqarnerata nalaani Jyllandspostenip Danmarkimi naqisimaneqarani oqaaseqarsinnaatitaaneq illersorpaa, oqartoqarlunilu muslimit allat assigalugit asissorneqarlutillu, mitallerneqarlutillu illaruaatigineqarsinnaasut.

Muslimit suliniaqatigiiffii ima ajuallatsinneqartigipput allaat Jyllandsposteni mitalliisimasutut ammillu qalipaataanik immikkoortitsisutut politiinut tunniullugu.

Naalagaaffiup unnerluussisartua unnerluutiginnikkumanngimmat suliniaqatigiit arfineq-marluusut Jyllandspostenip akisussaalluni aaqqissuisua kulturimullu tunngasunut akisussaassua mamarliisimasutut ajuallatsitsisimasutullu unnerluutigaat. Tassalu taakkua ullumikkut eqqartuussivimmi pinngitsuutitaapput.

Muslimit suliniaqatigiiffiisa eqqartuussinerup inernera akueriumanngilaat suliassarlu eqqartuussivinnut qulliunerusunut ingerlateqqinniarlugu oqaatigaat.

Taamaattumik muuamaat ilaarlugu titartakkat pillugit suliassaq naammassigallartussaanngikkallarpoq.

Syriami inatsisartunut ilaasortaq oqarpoq eqqartuussinerup inernerata nunat killiit nunallu muslimeqarfiusut akornanni avissaartuunneq annerulersiinnaraa.