Jyllandsposten: Namminersulivinnissaq sapiiserpallaarneruvoq
Allaaserisami aningaasaqarnermik ilisimatuut innersuussutigineqarput, taakkumi oqarmata namminersulivinneq 2016-imi eqqunneqassappat nunatsinni innuttaasut inuuniarnerat nunani siuarsagassanisut appasitsigilissasoq. Aviisip taamatut tuaviupilunneq sapiiserpallaarnerunerarpaa aamma Siumup naalakkersuinikkut anguniagaanik misileraanerunerarlugu.
Taamaattorli Jyllandspostenip Kalaallit Nunaata Namminersornerulluni ukiuni 25-ni ingerlatsinera siuariarnerusoq nassuerutigaa. Danmarkimit tapiissutit ataatsimoortut nunami pilersitat tamakkiisut 35 procenteraat, kisitsilli taanna 1979-imi, namminersornerulerneq eqqunneqarmat 65 procentiugaluarpoq. Taamaattorli aviisi isumaqarpoq namminersulivinnissamik kissaateqarneq, uuliasiornermit, aatsitassarsiornermit erngullu nukissiuuteqarnermit aningaasarpassuarnik isaatitsilernissamik kissaateqarnermik tunngaveqartoq.
Aviisi isumaqarpoq, Siumut akisussaassuseqanngitsumik piffissami qanittumi namminersulivinnissamik ulluliisimasoq, namminersulivinnerup aningaasatigut nammanneqarsinnaanera qulakkeeqqaarnagu. Taamaattorli aviisip kalaallit aningaasarsiornermik ingerlatsinerata, siunissaq ungasinnerusoq isigalugu imminut napatissinnaaleriartornissaanik anguniagaqarneq nuannaarutigaa.
