Jyllands-Postenip utoqqatserneq Egyptinip aviisiani

Egyptenimi danskit nioqqutissaannik pisisartut Cairo-mi danskit aallartitaqarfiat suleqatigalugu Jyllands-Postenip muuamaamik titartakkanik saqqummersitsisimanerminnik utoqqatsissuteqarnerat aviisimi ullormut saqqummersartumi al Ahram-imi saqqummersippaat.

Jyllands-Postenip utoqqatsernerata naqinneqarnera 300.000 koruuninik naleqarput.

Hisham Omar Egyptinimi danskit nakorsaasiaannik pisisartuni atorfeqartoq Kristeligt Dagbladimut oqarpoq, utoqqatsernerit naqinneqarmatali annertuumik allannguuteqartoqarsimasoq.

Danskit inuussutissarsiornermi kattuffissuata Dansk Industri-p nuannaarutigaa Eqyptinimi nioqqutissaatillit Kangiani qiterlermi danskit nioqqutaannik pisiumajunnaarneq killormut saatinniarlugu iliuuseqalermata.

-Egyptinimi nioqqutissaatillit iliuuseqalernerat allatorujussuaq sunniuteqarpoq. Taakku tusaaniarneqartarput. Pisoq pillugu eqqunngitsunik paasititsiniaanerit annertuut pisimapput, maannali niuertut namminneq Jyllands-Postenip utoqqatsernera saqqummersippaat, tamannalu assorsuaq pitsaasuuvoq, Marianne Carstenskiold oqarpoq.

Danmarkimut danskillu inuussutissarsiorneranut uparuartuinerujussuit ingerlanneqartut immuliorfissuup Arlap Kangiani qiterlermi avisiini siornatigut iliuuseqarfiginiarsarigaluarpaat iluatsinngitsumilli.