Jyllandip avannaani ilinniakkaminnik naammassinnittartut ikeqaat
Kalaallit Region Nordjyllandimi 2008-mi ilinnialersut 36-upput, 2011-milu 79-iullutik.
Ilinniagaqalernissamut siorna 2011-mi qinnuteqartut 2008-mut sanilliullugu aamma marloriaatinngorsimapput.
Ilinniakkaminnilli naammassinnittut ikeqisut aamma takuneqarsinnaavoq. Ilinniakkaminnik naammassinnittut 2008-mi 23-upput, siorna 2011-mi 28-ullutik.
Kisitsisit taakku qaffasinnerunnginnerannut pissutaasut marluusut, Aalborgimi Kalaallit Illuata oqaatigaa. Kisitsisimmi takutippaat, ilinniakkamik aallartittut nutaat ilarpassui ilinniakkamik sivisuumik aallartitsisimasut, tassalu naammassinnissimasutut soorunami nalunaarsorneqarsinnanatik.
Pissutaasullu aappaa ajoraluartumik tassaavoq ilinniakkaminnik naammassinninngitsut amerliartuinnarnerat. Ilaat ilinniarusunngisaminnik aallartissimapput, ilaasa ilinniakkami piumasaqaatit naammassisinnaasimanngilaat, ilaat qallunaatut pikkorippallaannginnertik pissutigalugu ilinniakkamik unitsitsiinnarsimallutik, ilaallu Danmarkimi inuunermik ajornartorsiuteqarlutik.
Ilinniakkamik siorna aallartitsisut affaat sinnerlugit ilinniakkaminnik unitsitsiinnarsimapput.
- Taama amerlatigit ilinnialikkamik taamaatitsiinnartarinerisa ilimanarsisippaa, Ilinniagaqalersut ilaasa Danmarkimi ilinniagaqalernissamut piareersimanngitsut, imalunniit ilinnialigassamut tunngasuniknaammattumik ilisimasaqarsimanngitsut, Aalborgimi Kalaallit Illuat allappoq.
Kalaallit Danmarkimi ilinniagaqalersut pitsaanerusumik siunnersorneqartalernissaat, nalunaarusiami ilaatigut siunniunneqartoq aamma atuarneqarsinnaavoq.
