Jyllandip avannaamiut umiarsuaq atorlugu takoqqusaalerput
Pilersaarutaavoq Sarfaq Ittuk Ilulissaniit, Aasiannut Sisimiunut, Maniitsumut Nuummullu ingerlaassasoq. Illoqarfinni taakkunani innuttaasut umiarsuarmukarlutik paasiniarsinnaassavaat ilinniarnikkut, inooqataanikkut suliffissaqarnikkullu Jyllandip avannaani periarfissat qanoq innersut.
Ilinniarfiit 16-it, suliffeqarfiit tallimat ilinniartut kattuffiat Avalak kommunelu peqataaniarput katillugit inuit Jyllandip avannaamiut 50-it peqataassallutik. Peqataaniartut ilagaat Aalborgip Universitetia.
- Aalborg Universitet pillugu nassuiaateqarnissamut periarfissatsialaavoq aamma periarfissaqartussaagatta Nuummi ilisimatusarfimmi suleqatitta oqaloqatiginissaannut. Aamma isertorsinnaanngilarput ilinniartut Aalborgiliarnissaat kissaatiginerugatsigu Københavniliartinneranniit, Aalborg Universitetimi ilinniartunut siunnersorti Lene Agger oqarpoq.
Kalaallit ilinniartut Danmarkimi kattuffiat Avalak aamma peqataaniarpoq kattuffiup Aalborgimi immikkoortoqarfiani JAKIP-imi siulersuisuni ilaasortaq Erno Petersen peqataassammat. Taanna isumaqarpoq ilinniartunngorumaartussat piareersarluarnissaat pingaaruteqartoq ilinniarnermik unitsitsiinnartartut ikilisarneqassappata.
- Ukioq kingulleq Jyllandip avannaani ilinniakkaminnik taamaatitsiinnartut 20 procentiupput Danmarkilu tamakkerlugu kalaallit taamaatiinnartut 35-40 procentip missaaniittarlutik. Tassani peqqutaakkajuttarpoq ilinniartut aningaasaqarniarnikkut imaluunniit ilinniartutut inoriaaseqarnermik artorsaateqarnerat, Erno Petersen oqarpoq.
Angalanermik aaqqissuisuuvoq Kalaallit Illuutaat Aalborgimiittoq. Pilersaarutaaqqaarsimagaluarpoq angalaneq ullunik marlunnik sivisunerussasoq ilaatigut Qasigiannguit tikeraarneqartussanut ilaatinneqarsimagaluarlutik. Kisianni aningaasaateqarfinnit aningaasat pissarsiarineqartut killeqarmata ullut angalanermut atugassat ikilisarneqarsimapput. Peqataasut tamarmik immikkut 20.000 koruuninik akiliissapput. Taama nalunaarpoq Kalaallit Illuutaanni Aalborgimi pisortaq Jan Thrydsøe.
- Matumani anguniarneqartoq pingaarneq tassaavoq Jyllandip avannaata nittarsaannissaa aammalu kalaallinut oqaluttuarinissaa tassani tikilluaqqunneqartut. Aamma oqaluttuariniarparput maani attavissaqartut aammalu Kalaallit Nunaat attaveqarfigineqarluartoq. Tassa taanna angalanitsinni oqaluttuarerusutarput, Jan Thrydsøe oqarpoq.
Pilersaarut imaarpoq:
5/9 Ilulissat Umiarsuaq pulaarneqarsinnaavoq: Nal. 17.00-20.00
6/9 Aasiaat Umiarsuaq pulaarneqarsinnaavoq: Nal. 10.00 - 12.00 aamma nal. 16.00 - 19.00
7/9 Sisimiut Umiarsuaq pulaarneqarsinnaavoq: nal. 10.00 - 12.00 aamma nal. 16.00 - 19.00
8/9 Maniitsoq Umiarsuaq pulaarneqarsinnaavoq: nal. 10.00 - 12.00 aamma nal. 16.00 - 19.00
9/9 Nuuk Umiarsuaq pulaarneqarsinnaavo: nal. 10.00 - 14.00
