Jyllandip avannaamiut Sarfaq Ittuk tiguarpaat

Sarfaq Ittuk ukiumoortumik imaani ussassaarinissaa, Seashow-imik taaguutilik aqagu aallartissaaq. Ussassaarineq aallartippat Jyllandip avannaani ilinniarfiit suliffeqarfiillu Kalaallinik inuusuttunik Jyllandip avannaanukaatinniarlugit ussassaarisoqassaaq.
Allattoq mlk, Knud Reimer
septembarip 04-at 2013 11:36

Taamatut aaqqissuisuusut tassaapput Aalborgimi Kalaallit Illuat, siuliantullu oqareernitsituut Kalaallit inuusuttaasa Jyllandip avannaanut nussorusulersinnaanissaat anguniarneqassalluni.

- Soqutisisaqaqatigiit paasissutissaataasa toqqaannartumik inuusuttunut apuussuunneqarnissaat siunertarineqarpoq. Seashow-ertoqarneratami nalaani ilinniarfiit suliffeqarfiilluunniit praktikkerfiusinnaasut toqqarlugit oqaloqatigineqarsinnaassapput, Aalborgimi Kalaallit Illuanni ulluinnarni aqutsisoq, Jan Thrysøe, 2011-mi siullerpaamik Seashoweqataasimasorlu oqarpoq.

Tassa Seashow-ertitsineq aappassaanik ingerlanneqartussanngorpoq, ukiorlu 2011-mi ingerlaterngaarneqarmat illoqarfiit nunatta qeqqaniittut, Qeqertarsuullu tunuaniittut tikeraarneqarsimariarlutik ukioq manna nunatta kujaterpiaamiut aallunneqassallutik.

- Ukioq 2011-mi Seashow-imik aaqqissuussineq iluatsilluarsimaqaaq. Inuimmi 2000 sinnerlualaavillugit pulaartoraavut, tassa Kalaallit Nunaata innuttaasa procentii sisamat umiarsualiaasimallutik, Jan Thrysøe oqarpoq.

- Atuartorpassuimmi ilinniagaqartullu allat Jyllandip avannaanukaanerinik kinguneqarsimavoq, asulu Seashow 2011-p ingerlanneqarnerani amerlaqisut umiarsuarmi naapereersimagivut.

Jan Thrysøe-lli Nunatta inuerunneqarnissaa siunertarinngerluaasarnerarpaa:

- Tassa kalaallit inuusuttaasa maani ilinniagaqalernissaat siunertariinnarparput, taakkulu soorunami angerlaqqittussaassallutik. Taamaattoqarnissaalumi uagut kalaallit illuaneersuusugut suliassatta pingaarnersaasa ilagalugu.

Aamma Seashow aqqutigalugu inuusuttut Danmarkimi pissutsinik ilikkagaqarnerunissaat neriuutiginerarpaa, ilinniarnermimmi naammassinagulu angerlaannartartut ikilinerunissaat anguniagaanerarlugu.

- Efterskoleni ilinniarfinnilu allani uniinnartartut amerlanerujussui ajornartorsiutigaarput, pissutsinillu paasisimasakinnermik aallaaveqarsoralutigu. Taamaammat inuusuttut Danmarkiliarnertik ajortuinnavinnik eqqaamasaqarfiginnginnissaannut akersuuteqataaniarsaraluta.

Seashow ingerlanneqalerpat Narsaq, Nanortalik, Qaqortoq, Paamiut aamma Nuuk tikinneqarumaarput. Angalanerup ingerlanissaa qarasaasiakkut attaveqaat – tassa linkeq- ataaniittoq iserfigalulug paasisaqarnerusinnaavutit.