Jyllandimiut suliffeqarfiutaat nunatsinni mittarfiliorusupput
Arctic Business Network-p Ålborgimi Jyllandillu avannaaneersunik suliffeqarfinnik 50-t missaaniittunik ilaasortallip, Kalaallit Nunaani Sulisitsisut Peqatigiiffiat suleqatigalugu aggustusip 20-ni siunissami sanaartukkatigut suleqatigiiffiusinnaasut pillugit Nuummi isumasiortitsilerput.
Arctic Business Network-p ulluinnarni aqutsisua Carl Otte Nicolaisen Ålborg-miittoq oqarpoq:
- Sanaartugassanut tunngasunik kalaallit suliffeqarfiutai qanittuararsuarmik suleqatiginissaat anguniartarparput, tamakku pillugu aggustusip 20-ani isumasioqatigiilerpugut. Kalaallit Nunaani suliffeqarfiit isumasioqatigissavagut sanaartugassat angisoorsuit ikioqatigiiffigisinnaanerivut, soorlu timmisartorsuarnut imarpik qulaallugu timmisartunut mittarfiliornertigut, taama nassuiaavoq Carl Otto Nicolaisen.
Aamma qularutiginnginnerarpaa Nuummi umiarsualiviliup allineqarnissaannut suleqatigiissinnaanertik. Namminnerlu suliarisartakkamittut oqaatigai tassaasut, ilinniartitaaneq sulisoqarniarnerlu.
- Ukiorpassuarni teknisk skoleni, Ilisimatusarfimmut, Niuernermi Ilinniarfimmut allanullu ilinniartitsisussarsiortoqaraangat suleqataasarpugut.
Aamma aatsitassarsiornermi misissueqqissaarfinni unnuisarfinnik pilersueqataasarpugut aamma Kalaallit Nunaani suliffeqarfiit suleqatigalugit.
Taama oqarpoq Carl Otto Nicolaisen Arctic Business Networkimi Ålborgimiittumi ulluinnarni aqutsisoq.
Kalaallit Nunaanni Sulisitsisut Peqatigiiffiani pisortaq Henrik Leth isumasioqatigiittunut saqqummiussisussaavoq, taanna paasiniaavigaara suut samminerussanerai.
- Nunap iluani sanaartukkat eqqarsaatigalugit namminersortut aningaasaleeqataasinnaapput, assersuutigalugu timmisartunut mittarfiliornermi, umiarsualiviliornerni allatigulluunniit, oqarpoq.
Suut killiliussat iluaqutigalugit allat aningaasaliisinnaappat Namminersorneq kisiat isumalluutigiuarnagu, Henrik Leth aperaaq nangipporlu.
- Inissiatigut sanaartornikkut aallarteriivissimavugut, tassuunakkut amerlanerpaatigut namminnersortut aningaasaliisalernermikkut allannguisoqarsimasoq takoreerparput.
Aamma assersuutigalugu nunani allani umiarsualiviit timmisartunullu mittarfiit namminersortunit pigineqarput pisariaqanngilaq pisortanit pigineqarnissaat. Tamakku tamarmik pisariaqartumik niuernermik pisariaqartitsipput, aatsaat niuernertaqarpat namminersortut ilaatinneqalersinnaammata, taama naggasiivoq Henrik Leth Kalaallit Nunaani Sulisitsisut Peqatigiiffiani pisortaq.
Isumasioqatigiinnermi Nuummi Katuami aggustusip 20-ni ingerlanneqartussami 150-t peqataajumallutik nalunaarsimapput. Peqataasussat Kattuffinneerput, namminersortuupput Pisortaqarfinneerlutillu.
