Juuntaaq tunuartariaqarpoq

Hans Egedep Illuani tallimanngormat unnukkut ilasseqatigiinnermi Inatsisartut siulittaasuata Jonathan Motzfeldtip Demokraatit sinnerlugit inatsisartunut ilaasortamik Jens B. Frederiksenimik appisaluussinera kinguneqartariaqartoq, Ilulissani qinersisartut apersukkatta akuerineqarsinnaanngitsutut isigaat, naak utoqqatsernera ilaannit sapiisernertut isigineqaraluartoq.

Radioavisi Ilulissani aqqusinerni isumasiuimmat, Sisamanit pingasut isumaqarput, Jonathan Motzfeldt inatsisartoqatiminik Demokratineersumik, Jens B. Frederiksenimik, appisaluussisimanini pissutigalugu Inasisartut siulittasuattut tunuartariaqartoq.

Karl Broberg isumaqarpoq, Jonathan Motzfeldt Inatisartut siulittasuattut ingerlaannassuguni ingasattoq.

- Inuinnartut allatulli malersorneqartariaqaraluarpoq. Inuit allat qanoq ilioraangata tunuartinneqartarput, Jonathan Motzfeldtilu tunuartinneqartariaqaraluarporluunnit, Karl Broberg oqarpoq.

Jonathan Motzfeldt-ip Jens B. Frederiksenimut utoqqatsernera, Niels Kristian Vetterlainip naammagisimaarpaa.

- Taanna inuppalaartutut tiguara. Utoqqasernera assorujuk nakuusutut tiguara. Aamma naammaginarpoq, inuk kinaluunniit kukkussuteqaraangami naqqiigaangami tulluarneruvoq, Niels Kristian Vetterlain oqarpoq.

Politikkeriussagaanni tatiginartoq, taava taama pissusilersortariaqanngitsoq, Jørgen Kristiansen isumaqarpoq.

- unioqqutitsigutta politinut suliassanngortinneqarsinnaavugut, Jonathan Motzgfeldtilu tunuartariaqarpoq.

Inuk taama qaffasitsigisumik inissisimasoq taamannak ajortuliorsimasoq kinguneqartinneqanngimmat, Kuluk Hansen-ip akueriuminaatsippaa.

- Inuit ajortuliorsimasut taama qullasitsigisumik inissisimanngikkaluarlutik pillangaasarput, kisianni Jonathan Motzfeldtip taama qullasitsigisumik inissisimanera pillangaannginneralu akueriuminaatsippara, Kuluk Hansen oqarpoq.