Juunip 21-aniit kalaallisuinnaq oqalulerunnanngilagut
Pingaartuuvorli kalaallit oqaasiinik ilinniartitsinissaq aamma kalaallit oqaatsinik allanik - assersuutigalugu danskisut tuluttullu - ilinniartinnissaat, Kultureqarnermut, Ilinniartitaanermut Ilageeqarnermullu Naalakkersuisunngortussaq Mimi Karlsen ima oqarpoq.
- 21. juni tassa nalunngilara kalalalit oqaasii nunatsinni pingaarnersatut inissinneqassasut. Soorunami taanna nalunngissutsitsigut tulluusimaanaqaaq taamatut inissittoqassammat - nammineq uagut oqaatsitta pingaarnersatut inissinnissaat, Mimi Karlsen oqarpoq.
IA-p naalakkersuisooqatigissaasalu Demokraatit aamma Kattusseqatigiit Partiiata isumaqatigiissutigaat oqaatsit pingaaruteqarluinnartuusut.
- Politikkissatsinni erseqqilluinnarpoq nunatsinni kalaallisut oqaluffiusumi aamma ilinniartitaanerup iluani oqaatsit assersuutigalugu qallunaat oqaasii aammalu tuluit oqaasii annertuumik pingaartillugit ilinniartitsissutissatut atortussatullu ineriartortinneqarnissaat periarfissaqassasoq, oqarpoq.
Ataasiinnarmik oqaaseqarneq - kalaallisuinnaq qallunaatuinnarlu nunatsinni takornartaanngillat, taakkumita naalakkersuisoqatigiilersussat qanoq iliuuseqarfigissavaat?
- Ulluni kingullerni eqqartukkatta taakku pingaarnertarivaat. Oqarniarutta qallunaat kalaallisut oqalussinnaanngitsut kalaallisut ilinniartinnerunissaannik periarfississallutigit.
Taamaammat Mimi Karlsenip pingaartippaa aamma kalaallisuinnaq oqaasillit eqqaamaneqassasut.
- Oqimaaqatigilluinnarmagu illuinnarmik kalaallisut oqaasillit aamma periarfissinnissaat, isumaqarpugut naligiilluinnarmik aamma taakku periarfissiuuttariaqartut misissuisariaqartugullu tamanna qanoq ineriartortissallugu, nassuiaavoq.
Mimi Karlsen aamma oqarpoq, assersuutigalugu illoqarfinni allagartarsuit allagartallu allat kalaallisut aamma oqaasertalersorneqalerpata kalaallisut oqaatsit pingaarnerpaanngorsimanerat malunnarsiartuaassasoq.
