Juullip ulloriaa qaqugukkut ikissava?
Juulli qalliartornerani igalaani ullorissat takussaasalerput.
Juullip ulloriaaliuna qanoq isumalik qaqugulu ikissava?
Juulli ungasilliartunngilaq, sapaatiuppammi sapaassuit siullianni nunatsinni pisarnertut orpik ikissaaq.
Juullilli ulloriaa qaqugukkut ikittarnersoq, aamma oqallisaangaatsiartarpoq. Taamaammat KNR-ip Nuummi ajoqi Kaj Peter Møller Heinrich paasiniaaffigivaa.
Taassumalu juullip ulloriaa noorlerniit kingornussarigipput oqaatigaa, tassa tyskit nunatsinnut ajoqersuiartortut qatanngutigiinniat.
- Juullip ulloriaanik sanasup noorlerneersup ulloriaq sanaani isumaqartissimavaa, ullaakkut seqernup nuilernerani ulloriaq venus nuisarnera taanna eqqarsaatigalugu Jesusip inunngorfia juullip ulluani inunngorfiani nuisarnera taanna pillugu ullorialiorsimavoq.
Ullumikkut sapaassuit siulleraat, decembarilli qaammataa sisamanngorpat aallartissaaq.
Kaj Peter Møller Heinrich naapertorlugu ulloriaq noorlernit kingornussarput sapaasuit siullianni ikittarpoq. Tamannalu ileqqunngorsimalluni 1733-iminngaanniit.
- Ulloriaq ikittarpoq sapaassuit siullermi. Ileqqoq malinneqartarpoq tassani sapaasuit siulleq ullorissat ikitserneqartarput. Inuit ilaasa aatsaat decemberip aallaqqaataani juullip qaammataanera eqqorlugu aatsaat ikinniartarpaat.
