Juullip nipitittagassaa ullumi nuisinneqassaaq
Novembarip ullui aatsaat aallartikkaluarlutigik qilanaarneq isertuussinnaajunnaareerparput:
Juulli qalliartorpoq!
Juullillu nipitittagaa juullilernerani piareersarnermut ilaalluinnarpoq.
Juullip nipitittagaa ukioq manna qanoq isikkoqassanersoq, kimillu titartarneqarsimanersoq, Juullip Nipitittagaata siulersuisuisa Katuap inersuaaraani tamanut ualeru saqqummiuppassuk, paasinarsissaaq.
Titartagaq titartaasorlu ukiut tamaasa isertuunneqarluinnartarput, taakkuli ualeru Radioaviisip nittartagaani – www.knr.gl –mi takusinnaassavasi.
Juullip nipitittagaa illoqarfinni najugallit allakkerivinni ullumimiit pisiarisinnaalissavaat.
Nunaqarfimmiulli allakkerivimminni pisiarisinnaassanngilaat.
- PostGreenlandimut attaveqarnerput aporfeqarmat, TelePostip sapaatip-akunneri arlaqanngitsut matuma siorna kalerrippaatigut, nunaqarfiit allakkeriviini juullip nipitittagaa tunineqarsinnaanngitsoq, Juullip nipitittagaata siulersuisuini siulittaasoq, Palle Høy, oqarpoq.
Nunaqarfimmiullu Juullip nipitittagaata nittartagaa aqqutigalugu nipitittakkanik allatsitsinissaminnut taamaalillutik innersuunneqarput.
