Juullip Inuata Qalasersuaq iluatigaa

Issittumi nunat killeqarfilerngusaanneranni, meeqqat juullip inuianik takorluugaat oqallinnermut ilaalerpoq, tassami Greenpeacep ussassaarinermini tamanna ilanngummagu.
decembarip 08-at 2013 12:16

Qalasersuaq Canadamit oqartussaaffigineqartariaqartoq Canadamik piumasarineqarluni sapaatip akunnerani matumani nalunaarutigineqareerpoq, taamatuttaaq Ruslandip Danmarkillu taama piumasaqaateqarnertik nalunaarutigereerlugu. Nunat taakku qalasersuarmik piginnittuunissaannik piumasaqaateqarnerat oqallisaagaatsiartussaassasoq ilimagineqareersinnaavoq.

Qalasersualerngusaannermi inuk ataaseq pingaaruteqarluartuusoq suli aperineqanngilaq, tassalu Juullip Inua. Nunarsuatsinni meerarpassuit nalunngilaat juullip inua Qalasersuarmi najugaqarmat, tassanngaanniillu poortukkanik pajuttuisartoq meeqqanit ilisimaneqarluni.

Meeqqat, inersimasullumi taama takorluuisarnerat Greenpeacep atorluarlugu avatangiisit pillugit maanna ussassaarusiorpoq. Ussassaarummi inuttaavoq tuluk isiginnaartitsisartoq, Jim Carter. Taanna juullip inuatut utoqqarsuartut, qasoqqasutut isumakuluttutullu takuneqarsinnaavoq, tassami issittumi silaannaap kissakkiartornerata pilersitaanik Qalasersuup eqqaa sikuerukkiartormat. Juullip Inuata annilagagaa angerlarsimaffeerunnissani.

Ussassaarummi Juullip Inuata meeqqat toqqarlugit ima saaffigai.

- Asasakka meeqqat, ajoraluartumik nutaarsiassaateqarpunga nuanniittumik, Juullip Inua oqarpoq imalu nangilluni:

- Qalasersuup eqqaani sikup aakkiartupiloornerata pilersitaanik maani inuuniarnerput ajornarsigaluttuinnarpoq. Taamaattumik Juullip nalliussisarnera taamaatittariaqassagunavipparput, Juullip Inua meeqqanut saaffiginnippoq.

Juullip Inuata aamma oqaatigaa, USA-p Ruslandillu præsidentiinut allagaqarsimagaluarami taakku qanoq iliuuseqarnissaat piumasaralugu, akineqarsimananili Juullip Inua oqarpoq. Taamaattumillu inuit taakku marluk ukioq manna juullimut poortukkanik pissanngitsut oqaatigalugu.

- Qalasersuup eqqaa tamarluinnavimmi maanna sikusarunnaalerpoq, Juullip Inua oqarpoq imalu nangilluni oqarluni.

- Qanoq iliortoqanngippat allatut ajornartumik juullimut tunissutissanik pajuttarunnaartariaqassaanga, Juullip Inua ussassaarummi taama oqarpoq.

Naggataatigullu isiginnaartut qinnuvigai, Qalasersuup annaanneqarnissaanik Greenpeace-p suliniutaa tapersersoqqullugu.