Juullip inuanut allakkat Århusimiut akissavaat

Juulliararnissaanut qaammat ataasiinnanngulillartorlu meeqqat tusindilippassuit Juullip Inuanut Kalaallit Nunaanni najugalimmut ukiut tamaasa nuannaarutissaannik tusarlerniarpavut. Tassamigooq angutit marluk Danmarkimi Århusimi najugallit meeqqat Juullip Inuanut Kalaallit Nunaanniittumut ukioq manna allagaat akissuteqarfigisarniarlugit aalajangersimapput.

Nuup Kommunea tamatumunnga aappaagu aningaasaliiniarpoq.

Kalaallit Nunaata juullimik sipaaruteqarniarnera Århusimiut ataataasut marluk, Jon Flintholmip aamma Jakob Lundbeckip assorsuaq ajuusaarutigisimavaat, taamaammat neqerooruteqarsimapput nissiaqqanik sisamanik namminneq aningaasaliiffigisassaminnik ikiortissarsiorniarlutik, nissiaqqanngooq taakku sisamat decembari tamaat ulapputissapput, aamma allagassiat allakkallu puussaat 50.000-t pisiarisimagujaat.

- Juullip Inuata sipaarutiginiarneqarnera tusaratsigu allamik eqqarsanngilagut: Ila, a', taamaattoqarsinnaanngilaq. Qanoq aamma Juullip Inua akiliisinnaajunnaarsinneqassava. Qamutai aamma arsaarinnissutaassappat? Naami, tamanna aaqqiivigisariaqarparput, ajunngisaartup aappaa, Jon Flintholm aviisimut MetroXpressimut ullumi oqarpoq.