Juullip inua soqutiginarsarpaat
Destination Diskomi sulisoq, Klaus Berg, Danmarkimiippoq juullip inuata soqutiginarsarnissaa pingaarnertut suliassaralugu.
Klaus Berg oqarpoq, meeqqat juullip inuanik ilisimasaqarnerulernissaat nittartakkakkut Santa.gl-ikkut ilaatigut anguniarlugu. Assigiinngitsunik aaqqissueqattaarpugut annerusumik Danmarkimi niuertut aningaasatigut tapertagaannik, juullilli inua soqutiginarsassagaanni meeqqanik nuannaartitsisarnera pinngitsoornagu sammisariaqarpoq. Uagullu aningaasanik katerseqataavugut, pingaarnerusumik Kalaallit Nunaanni, Danmarkimilu aammali nunani allani meeqqat pissakilliortut ikiorneqarnissaannut atugassanik. Suliniaqatigiippassuit meeqqat ulluinnarni inuuniarnerminni atugaat ikiorsiiffiginiarmatigit, uagut soorlu meeqqat allarluinnarnik misigisaqarusullutik angalaniartut tapersertarusuppavut.
Danmarkimi TV-kkut, tusagassiutitigullu allatigut juullip inuata takkuteqqinnera tusaqqusaarlugu saqqummertarpugut, ukiunilu tulliuttuni aalajaalluta juullip inuata soqutigineqarnera atorluarniartariaqarparput.
Aappaagu naatsumik filmiliornissaq pillugu Århusimi aamma ataatsimeeqateqaqqammivunga, tassani juullip inuata Kalaallit Nunaanni sumiiffinni assigiinngitsuni assiliseqattaarnissaa anguniarparput, assillu taakku siunissami TV-kkut tusagassiuutitigullu allatigut kiisalu nittartakkatsinni atorsinnaassavagut, Destination Diskomi sulisoq, Klaus Berg oqarpoq.
