Juullip inua oqaluttualiaannaq

Ulluni makkunani juullip inui, nunarsuarmi assigiinngitsuneersut 170-it missaanniittut, Københavnimi nuannaariartarfimmi Bakken-mi naapisimaarput. Juullip inuanik pisortatigoortumik Kalaallit Nunaat peqanngilaq, taamaattussaasorlu, Juullip inuata sulliviani Santa Claus of Greenland-mi pisortaq, Anders Læsøe oqarpoq.

Bikki Reimer paasissutissiissaaq.

- Pisortatigoortumik juullip inuanik peqannginnissaq aalajangersimavarput, isumaqaratta juullip inua oqaluttuatut pissanganartuussasoq, taamaammat aalajangersimasumik juullip inuatut atorfinitsitsisimanngilagut, Anders Læsøe oqarpoq nangillunilu: - Kisianni juullip inua arlaatigut saqqumilaartinneqassagaangat, soorlu juullimi imaluunniit maannakkut Københavnimi juullip inuisa naapisimaarneranni, alajangersimasumik aallartitaqartarpugut, Anders Læsø oqarpoq.

Juullip inuatut atorneqartarpoq Ludvig Ringsted, taannalu juullip inuatut allagartartaarpoq 1995-mi. Ulluni makkunani juullip inui, nuliai ikiortaalu katillugit 170-it missaanniittut, Københavnimi naapisimaarput. Juullip inuatut nunatsinniit aallartitaasoq, Ludvig Ringsted maanna Københavnimiittoq, oqaluttuarpoq juullip inuisa ataatsimuualaarnerat aallarnerlugu, ullumikkut nuannaariartarfimmi Bakken-mi juullip inui qarlortartartumik ingiaqateqarlutik angalaaqatigiissimasut.

- Københavnimi juulliip inui ataatsimoornermi peqataasut tamarmik isumaqatigaat, Juullip inua Kalaallit Nunaanni najugaqartuusoq, Ludvig Ringsted oqaluttuarpoq nangillunilu; - Juullip inuanut allagaasartut pimoorunneqarnerullutik aallunneqarnissaat anguniarneqartariaqarpoq, pingasunngorpallu juullip inui ataatsimeersuarnerat aallartippat, siunnersuummik aaqqiissutaasinnaasumik saqqummiussissamaarpunga Ludvig Ringsted, nunarput sinnerlugu juullip inuisa naapinnerani aallartitatut peqataatinneqartoq oqarpoq.

Kalaallit Nunaanni Juullip inuata ingerlanneqarnera, siulersuisoqarneralu Tele Greenland-mit, Tele post-mit Greenland tourismemillu ingerlanneqarpoq.