Juullip inua Nuummut tikeqqissaaq
![](/sites/default/files/styles/image_934x467/public/article_images/julemand630.jpg?itok=_5b1mCGU)
Pinngitsoorneqarsinnaajunnaarsimagunarpoq Juullip Inuata Nuummi SANA-p saavanut helikopterimik tikittarnera. Ilaqutariit meerartallit juulliaqqami qulinngulernerani aggiasarput Juullip inua aalateriffiginiarlugu.
Taanna ileqqoq uneqqajaaleraluarpoq Nuuk Tourism Juullip inuata sannavianik ingerlatsisoq akiliisinnaajunnaarmat Juullillu inua Qaasuitsup Kommunianut Qalasersuup avannarliup qaninnerpaasaanut nuummat.
Juullip inuata Nuummi meeqqat angerlarsimaffiinneersut helikopterimi ilaaqatigissavai SANA-llu saavanut mikkuni meeqqanut meerarpaluttumillu eqqarsartaasillit mamakujuttunik agguaassiffigissallugit.
- Sila ajorluinnassappat timmisartornissarlu ajornarluni, qatserisartut juullip inuanik angallassinissamut pisarnertut piareersimapput. Qanorluunniit pisoqaraluarpat juullip inuata takkunnissaa qularutissaanngilaq, Peqqissutsimut Pitsaaliuinermullu Aqutsisoqarfik nalunaarpoq, kikkullu tamaasa juullisiorluarnissaanik kissaallugit.
Air Greenland pisussamut tapersersuisuuvoq Juullillu inua akeqanngitsumik helikopterissunniarlugu.