Juullip Inua nukissiorfimmut pulaarmat

Jens Bjerge mekanikeritut sulinermini sapaatip akunneri marlukkuutaarlugit nunaannarsuarmi suliarsarpoq. Ilaquttani Nuummiitut sulereeraangami uterfigisarpai, ukiulli 20-t ingerlaneranni Utoqqarmiut Kangerluarsunnguanni arlaleriarluni juullisorsimavoq.

Utoqqarmiut Kangerluarsunnguat inoqajuitsuugaluartoq juullip inua apuuttartoq, Jens Bjergep oqaatigaa.

- Tassa ernerput pingasut-sisamat missaannik ukioqarallarmat, maani juullisioqatigivarput. Juulliaqqami ullaakkut juullip inua takkunnissaa eqqartumisaarlugu, taava sivitsulaaginnartoq eqqatsinni tuttorpassuit takkuteriasaarput. Soorunami ernerput nuannaartorujussuanngorpoq, juullip inua takkussimassammat.

Jens Bjerge ukiuni 20-ni Utoqqarmiut Kangerluarsunnguanni sulisoq taama oqarpoq.

Taassuma suliffimmini qasseriaq juullisiorsimanerluni eqqaamanngilaa, kisianni 1989-mi juullisioqqaarpoq.

Ilaquttat najornissai juullikkunni maqaasinarsinnaasarsimavoq, ingammik ernera nunatsinniitillugu.

- Ernerput Danmarkimi atualernikuugami, juullimi Nuummut tikeraaraangat, Utoqqarmiut Kangerluarsunnguanni sulisussaagaangama uggornalaarsinnaasarpoq oqimaalaarsinnaallunilu.

Jens Bjerge taama oqarpoq.

Taamaakkaluartoq Utoqqarmiut Kangerluarsunnguannut suliartornissani pinngitsoorsinnaaneq ajorpaa. Jens Bjerge savaatilinni peroriartorsimasup suliffimminit peqanngippallaaleraangami pinngortitami sulineq maqaasilersarpaa.

- Inuunitsinnut akuuginnalernikuuvoq aallartarnera aamma Utoqqarmiut Kangerluarsunnguinniinngippallaaleraangama aallarnissara pisariaqalertarpoq. Ilaquttakka suli naapinnagit maaniilernikuugama sungiutivinnikuuarput, Jens Bjerge taama oqarpoq.

Taamatut sulisarnini immikkuullarissutut oqaatigisinnaavaa.

- Maani sulilluni allaassutigivaa, inuit marluinnaasaratta ullut 14-ikkuutaarlugit. Allanillu tikittoqartarnani, ingammik ukiaanerani. Nerisassat nammineq ullut 14-inut naammattunik nassartarpugut, sulinerpullu nammineq aquttarlugu.

Utoqqarmiut Kangerluarsunnguanni mekanikeri taama oqarpoq.

Utoqqarmiut Kangerluarsunnguanni erngup aqqutaa, sapusiat, aqqusineq 15 kilometerimik isorartutigisoq, maskiinarsuillu mekanikerit marluk aserfallatsaaliortarpaat. Sissiugarlu aserfallatsaaliortarlugu.

Akisussaaffiisa annersaata ilagaat, innaallagiap aqqutaa 56 kilometerinik isorartutigisoq nakkutigissallugu.

- Atortut tamarmik paarilluartarpavut, nutarterlugillu suut tamarmik. Aasakkut aqqusinniortarpugut, sapusiallu timaanut alakkartertarpavut, ajoqquteqarpatallu suliarisarlugillu.

Jens Bjerge taama oqarpoq.

Sulisut suliassaqartuarput, sunngiffimmilu nunatta pinngortitaa susassaqartitsiuarpoq.