Juullip Inua Kalaallit Nunaanni najugaqarpa?

Juullip Inuata Nunatsinni najugaqarneranik upperinnittut internetsikkut maanna alakkarterisinnaanngorput. Nittartakkamimmi nutaamik pilersitsisoqarsimavoq, taannalu tassaavoq www.santa-greenland.com.

Nittartakkami tassani alakkarterisut allaffigisartagassaannik, gæstebogimik, ilaatigut peqarpoq, tassani soorlu oqaluttuarineqarsinnaavoq Juullip Inuata Kalaallit Nunaanni najugaqarnera sooq upperinerlugu.

Juullip Inuata nittartagarisimasaralua, maannakkorpiaq atorsinnaanngikkallartoq, tassa www.santa.gl, atuleqqissanersoq aamma taasissutigineqarsinnaavoq.

- Juullip Inuata nittartagaata iserfigineqarsinnaannginnera ajorpallaaqaaq, nittartakkamik nutaamik, www.santa-greenland.com - imik internetsikkut pilersitsisoqarnissaanik sulissutiginnittoq, Ulrik Motzfeldt oqarpoq.