Juullip Inua allakkanik suli nassiussisarpoq

Nunarsuatsinni meeqqat inersimasullu Juulimaamut allagaat, Qaasuitsup Kommunianit suli akisussaaffigineqarput.

Qaasuitsup Kommuniata 2011-mili pilersaarutigigaluarpaa, Juulimaap nittartagaa, sanat.gl atuutilissasoq. Kisiannili ulloq manna tikillugu nittartagaq taanna suli atulinngilaq.

 

Taamaattoq meeqqat inersimasullu Juulimaamut allagaat akineqartarput. Juulimaamut allakkanik ukioq manna akissuteqartuupput Uummannami 9. klassimi atuartut.

 

- Naluneqanngitsutut Juulimaaq Uummannarmiuuvoq. Aperineqarattalu allakkanik siornali akissuteqartarnissat isumagisinnaaneripput soorunami tamanna akueraarput. Juulimaamut siornaak akissuteqarlutik allattuupput Iluliarmiut atuartut, taakkulu isumaqarput Juulimaamut ikiortaaneq allat aamma misilittariaqaraat, tassalu uangut maanna taamaaliorpugut, Uummannami Atuarfik Edvard Krusemi 9. klassit ilinniartitsisuat, Tim Arnoldi oqarpoq.

Aamma atuaruk Juullip inua tuniniarneqalerpoq

Allakkat 5000-it sinnerlugit nassiunneqarsimapput

Uummannami atuartut allakkanik poorsuarnut 20-inut immiunneqarsimasunik 10.000-inik ukioq manna nassiussarsipput.

 

Juulimaamut siorna allattut ilaatigut Australiamiit, Hvideruslandimiit, Taiwanimiit aamma Kinamiit katillugit 5.000-it akineqarput. Ukioq mannalu akineqarlutik allaffigineqareerput 2.600-it.

 

Uummannami atuartut akissutinik allannerminnut nalunaaquttap akunneri 60.it ukiumut atortarpaat. Taamaakkaluartorli allattarnerit atuartunit nuannarineqaqaaq.

 

- Allakkanik akisisaqattaarluni ammaasaqattaarlunilu nuannertorujuuvoq, Juulimaap ikiortaasa ilaat 14-inik ukiulik, Johannes Jensen oqarpoq.

 

Danskit meerartaasa juullimut kissaatitik suttitillu nassiutissallugit nuannarigaat, kangiamiut Asiami najugaqartut inuusuttuaraanerusut, kissaatigisarpaat pitsaasumik ilinniagaqarnissartik.

 

- Taassuma saniatigut kissaatigisarpaat, pitsaasumik aappartaarnissartik, suliffittaarnissartik ilaqutariillu iluani ajunngitsumik inuuneqarnissartik. Inersimasup Korea Kujallermiup Juulimaamut allakkamini kissaataata pingaarnersaraat Korea Avannarlermi eqqissisoqarnissaa, Tim Arnoldi oqarpoq.

 

Qaasuitsup Kommuniata frimærkit allaffissallu akilersugarai. Allakkanillu akissuteqartut, ukioq manna Uummannarmiut atuartut 15.000 koruuninik akissarsitinneqartussaassallutik.

 

Paasisassarsiorlutik angalanissaminnut katersisut

- Juulimaamut allakkanik akissuteqartarnissatsinnut akuersinitsinnut pissutaavoq, atuartut Danmarkimut paasisassarsiortinneqartussaammata, tassalu atuaqatigiit aningaasanik katersuiniarnerminnut atatillugu Juulimaamut allattaanissaminnut akuersinerisa pissutaaqataasut ilaat, Uummannami atuarfik Edvard Krusimi ilinniartitsisoq, Tim Arnoldi oqarpoq.

Juullip Inuanut allakkat akineqartarnerinut Qaasuitsup Kommuniata aningaasat siorna atugai 125.000 koruuniupput.

Kisitsisit taakku ikileriarsimaqaat. Kommunimmi ilisimatitsissutigaa ukiormanna  taamaallaat 17.000 koruunit Juullip Inuanut allakkat akineqarnerinut maannamut atorneqartut.  

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat