Juullinnginnerani akissarsinissaq assortuussutaangaatsiarpoq
Oqallinnermi SIK siuttuusimavoq akissaatillu pillugit isumaqatigiinniartoqarnerani juullilernerani akissarsisitsisoqarnissaa piumasaqaatigisimavaa. Tamannali iluatsinneqarsimanngilaq. Kingorna Siumut, Atassutikkormiut ilaat maannalu aamma Atorfillit Kattuffiata decembarimi akissarsisitsinissap kingusissukkut pinissaa akerleralugu oqariartuuteqarput. Aamma kommunit Namminersorlutik Oqartussat kissaatigisaata piumasaatalu akerlianik iliorniarput, decembarimilu juulli sioqqullugu akissarsititsiniarlutik.
-Pisortani sulisunut tunngatillugu assigiinngisitsinermik pilersitsissaaq, ileqqorineqartormi kommunini sulisunut suli atuutissaaq, Namminersorlutik Oqartussanilu sulisunut atuutsinneqarani. Ingerlatseqatigiiffiit namminersortut, tassunga ilanngullugit aktiaateqarluni ingerlatseqatigiiffiit pisortanit pigineqartut juullertinnagu decembarimi akissarsisitsissappata, tamanna naalakkersuinut peqqusiileqinassaqaaq. Taamatummi pisoqassappat naaalakkersuisut saaffiginiagaasa 50%-ii ataallugit ileqqorineqartup atorunnaarsinneqarneranit eqqugaasussaassapput, Erik Hammeken Atorfillit Kattuffianeersoq naqissusiivoq.
Steen Lynge Atassummeersoq isumaqarpoq isumatusaarneq pinnagu misigissutsit oqallinnermi pineqartut. Juullinnginnerani akissarsisitsisarnerup ilaqutariinnut ajorsaateqartunut ukiumi nutaami sivisuumik aningaasatigut ajornartorsiortitsisarnera erseqqissaatigaa.
-Akissarsiassat qaammatit allat assigalugit tunniunneqarnissaannik aaqqissuussisoqarneratigut, ilaqutariit pisarnermisut qaammammoortumik aningaasartuutiminnut akiliisinnaassuseqassapput. Misilittakkammi ersersippaat ilaqutariippassuit januaarip kingorna qaammatini tullinnguuttuni januaarimi akiitsorilikkaminnut akilersuisariaqartartut, akissarsiat qaammatinut allanut naleqqiullugit "siusippallaartukkut" tunniunneqarsimanernnik peqquteqartumik, Steen Lynge sermitsiaq.ag-mut oqarpoq.
